దర్శకుడు పూరీ జగన్నాథ్ ఇక ప్రశాంతంగా సెలవు తీసుకుంటానంటున్నాడు. అదేంటి.. ఆయన మెగా ఫోన్‌కు గుడ్‌బై చెప్పబోతున్నాడా? అని కంగారు పడకండి. ఎందుకంటే ఆయన తీసుకునేది మీరనుకునే సెలవు కాదు. కొన్నాళ్లు ప్రశాంతంగా హాలీడే ట్రిప్‌కు వెళ్లనున్నాడు.
కొన్నేళ్లుగా ఎదురవుతున్న వరుస పరాజయాలకు ఎట్టకేలకు 'ఇస్మార్ట్ శంకర్'తో చెక్‌ పెట్టేశాడు పూరీ. రివ్యూల పరంగా ఈ చిత్రానికి మిశ్రమ ఫలితం దక్కినా.. కమర్షియల్‌గా భారీ వసూళ్లతో బాక్సాఫీస్‌ ముందు సత్తా చాటుతోంది. ఈ నేపథ్యంలోనే ఓ రెండు నెలల పాటు ప్రశాంతంగా విహారయాత్రకు వెళ్లాలని నిర్ణయించుకున్నాడు పూరీ. అంతేకాదు.. ఈ విరామంలో గట్టిగా కసరత్తులు చేసి పాత పూరి మాదిరిగా హుషారుగా మారిపోవాలని బలంగా నిశ్చయించుకున్నాడట.