ఈసారైనా పూరీ-చిరు సినిమా మొదలవుతుందా?

మెగాస్టార్ చిరంజీవి-పూరీ జగన్నాథ్​ కాంబినేషన్​లో త్వరలో ఓ సినిమా ప్రారంభం కానుందని వార్తలు వినిపిస్తున్నాయి. ప్రస్తుతం ఎవరి ప్రాజెక్టుల్లో వారు బిజీగా ఉన్నారు. అయితే ఈ విషయమై అధికారిక ప్రకటన రావాల్సి ఉంది.

మాస్ సినిమాలు తీయడంలో, హీరోలను డిఫరెంట్​ లుక్స్​లో చూపించడంలో దర్శకుడు పూరీ జగన్నాథ్ సిద్ధహస్తుడు.​ మెగాస్టార్ చిరంజీవితో కలసి పనిచేయాలనిఈ డైరెక్టర్ ఎప్పటి నుంచో అనుకుంటున్నాడు. కానీ అది కలగానే మిగిలిపోయింది. త్వరలో వీరి కాంబినేషన్​లో ఓ సినిమా ప్రారంభం కానుందనే వార్త ప్రస్తుతం చక్కర్లు కొడుతోంది. ప్రస్తుతం ఎవరి ప్రాజెక్టుల్లో వారు బిజీగా ఉన్న వీరిద్దరూ.. అవి పూర్తయిన తర్వాత ఈ ప్రాజెక్టును పట్టాలెక్కిస్తారట. అప్పుడైనా షూటింగ్ మొదలవుతుందా? లేదా మరికొంత కాలం ఆగక తప్పదా? అనేది చూడాలి.

ఈ విషయమైన ఇటీవలే మాట్లాడిన పూరీ జగన్నాథ్.. తనకు చిరుతో పనిచేసే అవ‌కాశం ఏకంగా నాలుగుసార్లు వచ్చినట్లే వచ్చి చేజారిందని అన్నాడు. రెండుసార్లు పూజా కార్య‌క్ర‌మాలు జరిగిన త‌ర్వాత ఆగిపోయిందని అన్నాడు.

నిజానికి చిరు రీఎంట్రీ 150వ సినిమా పూరీ జ‌గ‌న్నాథే చేయాలి. 'ఆటో జానీ' అంటూ క‌థ రాసుకుని, అప్ప‌ట్లో అధికారిక ప్రకటన కూడా ఇచ్చాడు నిర్మాత రామ్ చ‌ర‌ణ్. కానీ కొన్ని కారణాల వల్ల 'క‌త్తి' చిత్రాన్ని రీమేక్ చేశాడు మెగాస్టార్. ఆ త‌ర్వాత పూరీ వేరే సినిమాల‌తో బిజీ అయిపోయాడు. ఇటీవలే 'ఇస్మార్ట్ శంకర్'తో హిట్ కొట్టిన ఈ ద‌ర్శ‌కుడు.. చిరంజీవితో పనిచేసేందుకు మ‌రోసారి ప్ర‌య‌త్నాలు ప్రారంభించాడు.

ఇదీ చదవండి: టబు, భూమిక బాటలోనే రేణు దేశాయ్​!