పాపులర్ వెబ్సిరీస్ 'మనీ హైస్ట్' ఐదో సీజన్(Money Heist Season 5) సెప్టెంబర్ 3న నెట్ఫ్లిక్స్ వేదికగా ప్రసారం కాబోతోంది. ఈ సిరీస్కు భారత్లోనూ మంచి ఆదరణ ఉంది. ఈ నేపథ్యంలో 'వెర్వ్లాజిక్' అనే ప్రైవేటు సంస్థ తమ ఉద్యోగులకు అదిరిపోయే ఆఫర్ ఇచ్చింది. ఐదో సీజన్ విడుదల రోజును 'నెట్ఫ్లిక్స్ అండ్ చిల్'(Vervelogic Netflix Holiday) హాలీడేగా ప్రకటించి ఉద్యోగులను ఆశ్చర్యంలోకి నెట్టేసింది. ఈ మేరకు వర్క్ఫ్రమ్ హోమ్ టాస్క్ లిస్ట్ను కూడా విడుదల చేసింది.
అందుకే హాలీడే..
'మనీహైస్ట్' రిలీజ్ సందర్భంగా హాలీడే ప్రకటిస్తున్నట్లు వెర్వ్లాజిక్ సంస్థ సీఈఓ అభిషేక్ జైన్ తెలిపారు. 'మెజారిటీ ఉద్యోగులు ఆరోజు తప్పుడు కారణాలు చెప్పి సెలవు తీసుకుంటారు. కొందరు ఫోన్లు కూడా స్విచ్ఛాఫ్లో పెట్టేస్తారు. పెద్ద సంఖ్యలో ఉద్యోగులు బంక్ కొట్టే అవకాశముంది. అందుకే.. సెలవు ప్రకటించాలనే నిర్ణయం తీసుకున్నాం. కొన్ని సార్లు చిల్గా ఉండే అవకాశమిస్తే ఉద్యోగులు మరింత ఉత్సాహంతో పనిచేస్తారు' అని జైన్ పేర్కొన్నారు.