హిట్ సినిమాలను రీమేక్ చేయడం కత్తిమీద సాము. ప్రేక్షకులకు అది నచ్చాలంటే ఒరిజినల్కు ఏ మాత్రం తగ్గకుండా తీయాలి. లేదంటే మొదటికే మోసం వచ్చేస్తుంది. కానీ కొందరు మాత్రం రీమేక్ల వైపే ఎక్కువగా మొగ్గుచూపిస్తారు. అయితే ఇలా రీమేక్లు తెరకెక్కించడం సేఫ్ గేమ్ అని కొందరి అభిప్రాయం.
ఎందుకంటే ఒక్కసారి ఆకట్టుకున్న కథను కొద్దిపాటి మార్పులు చేసి తీస్తే సరిపోతుంది. అయితే ఈ మధ్య కాలంలో టాలీవుడ్లో రీమేక్ల జోరు బాగా పెరిగింది. అగ్రహీరోలు చిరంజీవి, పవన్ కల్యాణ్, వెంకటేశ్ ప్రస్తుతం వాటి చిత్రీకరణలతో బిజీగా ఉన్నారు. లాక్డౌన్ వల్ల దాదాపు ఎనిమిది నెలలు థియేటర్లు తెరుచుకోలేదు, లేదంటే ఈ పాటికే చాలా రీమేక్లు అభిమానుల ముందుకు వచ్చేవి. టాలీవుడ్లో ఇప్పుడు తెరకెక్కుతున్న రీమేక్లు ఏవి? వాటిలో ఎవరెవరు నటిస్తున్నారు? అనే విషయాల సమాహారమే ఈ కథనం.
రీమేక్స్లో మెగా బ్రదర్స్ దూకుడు
మెగా సోదరులు చిరంజీవి, పవన్కల్యాణ్.. చెరో రెండు రీమేక్లు ఒప్పుకుని దూకుడు చూపిస్తున్నారు. 'లూసిఫర్', 'వేదాళం' షూటింగ్లు వచ్చే ఏడాది ప్రధమార్థంలో ప్రారంభం కానున్నాయి. వీటిలో చిరు కథానాయకుడిగా నటిస్తారు. పవన్ నటిస్తున్న 'పింక్' రీమేక్ 'వకీల్సాబ్'షూటింగ్ చివరి దశకు వచ్చేసింది. 'అయ్యప్పనుమ్ కోషియుమ్' రీమేక్లో రానాతో కలిసి తెరను పంచుకోనున్నారు పవర్స్టార్. వీటిపై అభిమానుల్లో అంచనాలు అప్పుడే పెరిగిపోవడం విశేషం.
కొన్ని చిత్రీకరణల్లో.. కొన్ని విడుదలకు సిద్ధంగా