తెలుగు చలన చిత్ర పరిశ్రమలో నెలకొన్న సమస్యల పరిష్కారానికి మెగాస్టార్ చిరంజీవి ఎంతో కృషి చేస్తున్నారని విలక్షణ నటుడు ప్రకాశ్ రాజ్ అన్నారు. ఈ విషయంలో చిరంజీవి ఎంతో మందికి స్ఫూర్తిదాయకంగా నిలుస్తున్నారని కొనియాడారు. అలాంటి సోదరుడు దొరకడం అదృష్టంగా భావిస్తున్నట్లు ట్విట్టర్ ద్వారా వెల్లడించారు.
ఈ ఉదయం ఫిల్మ్ నగర్ అపోలో ఆసుపత్రి జిమ్లో చిరంజీవితో ప్రత్యేకంగా సమావేశమైన ప్రకాశ్ రాజ్.. చిత్రపరిశ్రమలో ఇటీవల నెలకొన్న పరిణామాలపై కాసేపు చర్చించారు. మరోవైపు నటీనటుల సంఘం అధ్యక్ష ఎన్నికల బరిలో ఉన్న ప్రకాశ్ రాజ్కు చిరంజీవి మద్దతు ఇచ్చారు. ఈ క్రమంలో ఈ ఇరువురి జిమ్ భేటీ చిత్ర పరిశ్రమలో ప్రాధాన్యం సంతరించుకుంది.
చుక్కల మేళం దిక్కుల తాళం..
సుధీర్‌ బాబు కథానాయకుడిగా దర్శకుడు కరుణ కుమార్‌ తెరకెక్కిస్తోన్న చిత్రం 'శ్రీదేవి సోడా సెంటర్‌'. ఆనంది కథానాయిక. విజయ్‌ చిల్లా, శశి దేవిరెడ్డి నిర్మాతలు. ఈ సినిమాను ఆగస్టు 27న ప్రేక్షకుల ముందుకు తీసుకొస్తున్న నేపథ్యంలో తాజాగా ఓ మెలొడీని విడుదల చేసింది చిత్ర బృందం. 'చుక్కల మేళం దిక్కుల తాళం' అంటూ సాగే ఈ గీతం అన్ని వర్గాల శ్రోతల్ని అలరించేలా ఉంది.
సుధీర్‌- ఆనంది జోడీ కనువిందు చేస్తోంది. ఇద్దరి హావభావాలు ఆకట్టుకుంటున్నాయి. పెళ్లి నేపథ్యంలో రూపొందించిన ఈ పాటను అనురాగ్‌ కులకర్ణి ఆలపించారు. కల్యాణ్ చక్రవర్తి సాహిత్యం అందించారు. మణిశర్మ స్వరాలు సమకూర్చారు. ఈ చిత్రంలో సూరిబాబుగా కనిపించనున్నారు సుధీర్‌. శ్రీదేవిగా ఆనంది సందడి చేయనుంది. నరేశ్‌, రఘుబాబు, అజయ్‌, సత్యం రాజేశ్‌, హర్షవర్ధన్‌ తదితరులు ఈ మూవీలో కనిపించనున్నారు.
ఇదీ చదవండి:థియేటర్లలో పెద్ద సినిమాల సందడి ఎప్పటికో?