ప్రభాస్ హీరోగా నటిస్తున్న 'రాధేశ్యామ్', 'ఆది పురుష్‌', 'సలార్' చిత్రాలన్నీ కొవిడ్‌ పరిస్థితుల వల్ల తాత్కాలికంగా నిలిచిపోయాయి. ప్రస్తుతం పరిస్థితులన్నీ క్రమంగా కుదుటపడుతుండటం వల్ల.. ఈ సినిమాల్ని తిరిగి సెట్స్‌పైకి తీసుకెళ్లేందుకు ఆయా చిత్ర బృందాలు సన్నాహాలు చేసుకుంటున్నాయి. ఈ నేపథ్యంలోనే ప్రభాస్ తొలుత ఏ చిత్రం కోసం రంగంలోకి దిగుతారన్నది ఆసక్తికరంగా మారింది. ప్రస్తుతం చిత్ర వర్గాల నుంచి అందుతున్న సమాచారం ప్రకారం.. ప్రభాస్ తొలుత 'రాధేశ్యామ్' సెట్లోకి అడుగు పెట్టనున్నట్లు తెలుస్తుంది. ఈ సినిమా మరో వారం రోజుల చిత్రీకరణ మిగిలి ఉందని.. జులై నుంచి చిత్రీకరణ పునఃప్రారంభించేందుకు ప్రణాళిక రచిస్తున్నారని ప్రచారం వినిపిస్తోంది.
ఇందుకోసం ఇప్పటికే హైదరాబాద్‌లో ఓ ప్రత్యేక సెట్ను సిద్ధం చేసినట్లు తెలిసింది. ఇది పూర్తయిన వెంటనే ఆయన ‘సలార్’ కోసం రంగంలోకి దిగుతారని సమాచారం. అయితే ఈ రెండు చిత్రాల కన్నా ముందు ‘ఆదిపురుష్’ సెట్స్‌పైకి వెళ్లన్నుట్లు తెలుస్తుంది. నిజానికి ఈ సినిమా కొత్త షెడ్యూల్‌ హైదరాబాద్‌లో ఉంటుందని ఆ మధ్య వార్తలొచ్చాయి. కానీ, ఇప్పుడీ షెడ్యూల్‌ ముంబయిలోనే ప్లాన్‌ చేస్తున్నట్లు చిత్ర వర్గాల నుంచి సమాచారం అందుతోంది.