'నేను ఎప్పుడూ చూడని ఈ కళ్లు నన్ను దేవుడిలా చూస్తున్నాయి.. నేను ఎవర్నీ?'... అనే మాట వినగానే బాక్సాఫీస్ ఎప్పుడూ చూడని ఓ బ్లాక్బస్టర్ కళ్లముందు కదలాడుతుంది. ప్రేక్షకులు ఎన్నడూ కనని విజువల్ వండర్ మదిలో మెదులుతుంది. భారత సినిమా గొప్పతనాన్ని ప్రపంచానికి ఘనంగా చాటిన 'బాహుబలి'.. గుర్తుకువస్తుంది. ఈ సినిమా విడుదలై నేటికి ఆరేళ్లు పూర్తి చేసుకున్న సందర్భంగా ప్రత్యేక పోస్టు పెట్టాడు హీరో ప్రభాస్. 'బాహుబలి' టీమ్కు అభినందనలు తెలిపాడు. దేశంలోనే కాక ప్రపంచవ్యాప్తంగా ఈ సినిమా అద్భుతాన్ని సృష్టించిందని అన్నాడు.
'బాహుబలి'.. తెలుగు వారి ప్రతిభను, ఖ్యాతిని ప్రపంచానికి చాటి చెప్పిన సినిమా. దర్శక ధీరుడు ఎస్‌.ఎస్‌ రాజమౌళి ప్రతిష్టాత్మకంగా తెరకెక్కించారు. ఇందులో బాహుబలిగా ప్రభాస్ నటన యావత్‌ సినీ అభిమానుల్ని ఆకట్టుకుంది. శివగామిగా రమ్యకృష్ణ అభినయం ఎప్పటికీ గుర్తుండిపోతుంది. భళ్లాలదేవగా రానా, దేవసేనగా అనుష్క, అవంతికగా తమన్నా, కట్టప్పగా సత్యరాజ్‌ ముఖ్య భూమిక పోషించారు. ఎం.ఎం.కీరవాణి సంగీతం ఈ సినిమాను మరోస్థాయికి తీసుకెళ్లింది. వీఎఫ్ఎక్స్‌, మాహిష్మతి రాజ్యం సెట్‌ సినిమాకే హైలెట్‌గా నిలిచాయి.