'అల వైకుంఠపురములో' సినిమాలో పూజా హెగ్డే లుక్ను విడుదల చేసింది చిత్రబృందం. ఆదివారం ఈ హీరోయిన్ పుట్టినరోజు సందర్భంగా పోస్టర్ను సామాజిక మాధ్యమాల వేదికగా అభిమానులతో పంచుకుంది నిర్మాణ సంస్థ హారిక అండ్‌ హాసిని క్రియేషన్స్‌.
ఈ పోస్టర్‌లో పూజ.. బాక్సింగ్‌ గ్లౌజులు వేసుకుని పంచ్‌ విసరడానికి సిద్ధంగా ఉన్నట్లు కనిపించింది. "కష్టపడేతత్వం, అందం, ప్రతిభ ఉన్న కొత్త తరం నటి పూజాహెగ్డే. ఈ ఏడాది మొత్తం మీకు విజయాలు చేకూరాలని 'అల..వైకుంఠపురములో' చిత్రబృందం తరఫున కోరుకుంటున్నాం. హ్యాపీ బర్త్డే పూజా హెగ్డే" అని ట్వీట్ చేసింది చిత్ర యూనిట్.
'అల..వైకుంఠపురములో' పూజాహెగ్డే స్టైలిష్ స్టార్ అల్లు అర్జున్‌, త్రివిక్రమ్ కాంబినేషన్లో తెరకెక్కుతోందీ చిత్రం. మూడోసారి ఈ ద్వయం కలిసి పనిచేస్తుండటం వల్ల సినిమాపై భారీ అంచనాలు నెలకొన్నాయి. అల్లు అరవింద్‌, ఎస్‌.రాధాకృష్ణ నిర్మాతలు. 'డీజే' తర్వాత పూజా-బన్నీ కాంబినేషన్లో వస్తోన్న రెండో సినిమా ఇది. వచ్చే ఏడాది జనవరి 12న ఈ మూవీ ప్రేక్షకుల ముందుకు రానుంది.
ఫుల్ బిజీగా...
'అల...వైకుంఠపురములో' సినిమాతో పాటు అఖిల్‌తో ఓ సినిమాలో నటిస్తోంది పూజ. యంగ్‌ రెబల్‌ స్టార్ ప్రభాస్‌ కథానాయకుడిగా రాధాకృష్ణ దర్శకత్వంలో వస్తోన్న మరో సినిమాలోనూ సందడి చేయనుంది. మహేశ్‌ కథానాయకుడిగా తెరకెక్కుతున్న 'సరిలేరు నీకెవ్వరు'లో ఓ ఐటమ్‌ సాంగ్‌లో కనిపించనుంది. ఇటీవల విడుదలైన 'గద్దలకొండ గణేష్‌' చిత్రంతో మంచి విజయాన్ని ఖాతాలో వేసుకుందీ టాలీవుడ్‌ ముద్దుగుమ్మ.
