మోదీ రమ్మన్నా 'నో' చెప్పిన పునీత్​.. కారణం ఇదే...

Puneeth Rajkumar Modi: కన్నడ పవర్​స్టార్​, దివంగత పునీత్​ రాజ్​కుమార్​ మొదటినుంచీ రాజకీయాలకు దూరంగానే ఉన్నారు. ఒక్కరోజు కూడా ఏ ఒక్క పార్టీ తరఫున ప్రచారం చేయలేదు. కానీ.. ఆయన రాజకీయాల్లోకి రావాలని అనుకున్నారా? మూడేళ్ల కింద ప్రధాని నరేంద్ర మోదీ స్వయంగా.. పునీత్​ను పాలిటిక్స్​లోకి ఆహ్వానించారట. రాజ్​కుమార్​ సన్నిహితుడు ఈ ఆసక్తికర విషయాలను ఈటీవీ భారత్​కు వెల్లడించారు. ఆయన ఇంకా ఏం చెప్పారంటే?

Puneeth Rajkumar Modi: తన నటన, వ్యక్తిత్వంతో ఎంతో మంది అభిమానులను సంపాదించుకున్నారు ప్రముఖ కన్నడ నటుడు పునీత్​ రాజ్​కుమార్​. అంతా ఆయనను ముద్దుగా అప్పూ అని పిలుచుకుంటారు. వారందరికీ తీరని శోకాన్ని మిగిల్చి.. కానరాని లోకాలకు వెళ్లిపోయారు పునీత్​. సినీ, రాజకీయ ప్రముఖులు సహా యావత్​ ప్రజానీకం ఆయనకు కన్నీటి వీడ్కోలు పలికారు. ప్రధాని నరేంద్ర మోదీ కూడా ఆ సమయంలో సంతాపం వ్యక్తం చేస్తూ ట్వీట్​ చేశారు.

Puneeth Rajkumar Meets Modi: రాజకీయాలంటే అంతగా ఇష్టం లేని పునీత్​ రాజ్​కుమార్ గురించి ఓ ఆసక్తికర విషయం చెప్పారు ఆయన సన్నిహితుడు ఎన్​ఎస్​ రాజ్​కుమార్​. రాజకీయాల్లోకి రావాలని ప్రధాని నరేంద్ర మోదీ ఓసారి అప్పూను అడిగారట. ఈ విషయాన్ని పునీత్​ స్వయంగా తనకు చెప్పారని ఎన్​ఎస్​ రాజ్​కుమార్​ గుర్తుచేసుకున్నారు. రాజకీయాల్లోకి వచ్చే ప్రసక్తే లేదని అన్నట్లు వెల్లడించారు.

''నీలాంటి యువతారలు కచ్చితంగా రాజకీయాల్లోకి రావాలని పునీత్​ను కోరారు మోదీ. ప్రధానితో మాట్లాడిన తర్వాత పునీత్​ బయటకు వచ్చి ఈ విషయం నాతో చెప్పారు. రాజకీయాల్లోకి ఎప్పటికీ రానని అప్పుడు నాతో అన్నారు.''

- ఎన్​ఎస్​ రాజ్​కుమార్​

కర్ణాటక వచ్చిన సమయంలో.. పునీత్​ రాజ్​కుమార్​ దంపతులను ప్రధాని ఆహ్వానించారని చెప్పారు ఎన్​ఎస్​. మొదట వెళ్లేందుకు అప్పూ తిరస్కరించినా.. తన మాటలకు గౌరవం ఇచ్చి బెంగళూరు హెచ్​ఏఎల్​ విమానాశ్రయం వద్ద మోదీని కలిశారని వెల్లడించారు.

మోదీతో పునీత్​ రాజ్​కుమార్​ దంపతులు

''మోదీని కలిసిన సమయంలో.. పునీత్​ తన తండ్రి డా. రాజ్​కుమార్​ జీవిత కథ పుస్తకాన్ని గిఫ్ట్​గా ఇచ్చారు. అప్పుడు మోదీ ఫ్లైట్​ కాస్త ఆలస్యం అయింది. అయినా పునీత్​తో 7 నిమిషాలపాటు మాట్లాడారు.''

- ఎన్​ఎస్​ రాజ్​కుమార్​

మోదీకి తన తండ్రి జీవితకథ పుస్తకాన్ని ఇస్తున్న అప్పూ

అంతకుముందు.. పునీత్​తో మాట్లాడేందుకు నిర్మాత ఎస్​పీ బాబు ద్వారా భాజపా నేతలు ఆశిష్​, పీవీఎస్​ శర్మ తనను సంప్రదించారని ఎన్​ఎస్​ రాజ్​కుమార్​ చెప్పారు. అప్పుడే పునీత్​కు రాజకీయాల పట్ల ఆసక్తి లేదని ఆశిష్​కు చెప్పినట్లు వివరించారు.

భాజపా నేతలతో పునీత్​ రాజ్​కుమార్​

''ఆశిష్​తో.. మీ ఆఫర్​ను పునీత్​ ఒప్పుకోరని చెప్పా. కానీ.. పునీత్​ దగ్గరకు తీసుకెళ్లాలని నన్ను బలవంతపెట్టారు. ఆశిష్​ను, శర్మను అప్పూ ఇంటికి తీసుకెళ్లా. కానీ.. రాజకీయాల్లోకి వచ్చేందుకు ఆయన ఒప్పుకోలేదు. చిన్నగా నవ్వి.. లోపలకు వెళ్లి టీ తీసుకొచ్చారు. బయటకు వచ్చాక రాజకీయాల గురించి మాట్లాడలేదు.''

- ఎన్​ఎస్​ రాజ్​కుమార్​

అక్టోబర్​ 29 ఉదయం 11:30 గంటలకు జిమ్​లో వ్యాయామం చేస్తున్న సమయంలో పునీత్​కు ఛాతిలో నొప్పి వచ్చింది. దీంతో ఆస్పత్రిలో చేర్చారు. కానీ వైద్యులు ఆయన ప్రాణాలు కాపాడలేకపోయారు. ఈ విషయం తెలియగానే పలు భాషలకు చెందిన నటీనటులు.. సంతాపం వ్యక్తం చేశారు. అభిమానులు శోకసంద్రంలో మునిగిపోయారు.

పునీత్​కు భార్య, ఇద్దరు కుమార్తెలు ఉన్నారు. అప్పూ మొత్తం 32 కన్నడ సినిమాల్లోనటించారు. ఇందులో ఎన్నో బ్లాక్​బస్టర్లు ఉన్నాయి.

ఇవీ చూడండి: