హరీశ్ శంకర్... సినిమా సినిమాకీ గ్యాప్‌ అయితే తీసుకుంటాడు కానీ, ఒక్కసారి థియేటర్‌కి వచ్చిన ప్రేక్షకుడికి మాత్రం గ్యాప్‌ ఇవ్వకుండా వినోదం పంచుతాడు. మొదటి సినిమా 'షాక్‌' నుంచి గతేడాది వచ్చిన 'గద్దల కొండ గణేష్‌' వరకూ అతడు 'ట్రెండ్‌ను ఫాలో కాలేదు... సెట్‌ చేశాడంతే. 'గబ్బర్‌ సింగ్‌'తో పవన్ స్టామినా ఏంటో ప్రేక్షకులకు రుచిచూపించాడు. 2012లో వచ్చిన ఈ చిత్రం బాక్సాఫీస్‌ వద్ద భారీ విజయాన్ని అందుకుంది. మళ్లీ 8ఏళ్ల తర్వాత మరోసారి పవన్‌ను డైరెక్ట్‌ చేసే అవకాశం వచ్చింది. హరీశ్ శంకర్ కెరీర్‌పై ఓ లుక్వేస్తే చేసిన ఏడు సినిమాల్లో నాలుగు మెగా హీరోలవే కావడం విశేషం. ఇప్పుడు పవన్‌తో మరోసారి కలిసి పనిచేస్తున్నాడు.
రికార్డులు సృష్టించిన గబ్బర్‌ సింగ్‌
'జల్సా' తర్వాత పవన్‌కు సరైన హిట్‌ పడలేదు. ‘పులి’, ‘తీన్‌మార్‌’, ‘పంజా’ పెద్దగా మెప్పించలేకపోయాయి. ఆ సమయంలో పవన్‌తో సినిమా చేసే అవకాశం దక్కించుకున్నాడు హరీశ్. హిందీలో ఘన విజయం సాధించిన ‘దబంగ్‌’ కథను మార్పులు చేసి తెలుగు ప్రేక్షకులకు నచ్చేలా తీర్చిదిద్దాడు. ఇక ఐరన్‌లెగ్‌గా ముద్రవేసుకున్న శ్రుతిహాసన్‌ను కథానాయికగా తీసుకుని ఆశ్చర్యపరిచాడు. 'నాకొంచెం తిక్కుంది.. కానీ దానికో లెక్క ఉంది', 'నేను ట్రెండ్‌ ఫాలో అవ్వను... సెట్‌ చేస్తా' వంటి పంచ్‌ డైలాగ్‌లు, యాక్షన్‌, కామెడీ ఎంటర్‌టైనర్‌గా ఓ ఊపుఊపేశాడు. వేసవిలో విడుదలైన ఈ చిత్రం ప్రేక్షకులకు మంచి వినోదాన్ని పంచడమే కాదు.. బాక్సాఫీస్‌ వద్ద భారీ విజయాన్ని సొంతం చేసుకుంది. ‘అంత్యాక్షరి, కెవ్వు కేక ఐటమ్‌ సాంగ్‌ యువతను విశేషంగా అలరించాయి.
మెగా మేనల్లుడితో..
మెగా మేనల్లుడు సాయితేజ్‌కి మొదటి కమర్షియల్‌ హిట్‌ అందించిన చిత్రం 'సుబ్రమణ్యం ఫర్‌ సేల్‌'. రెజీనా కథానాయికగా నటించిన ఈ చిత్రం మంచి విజయాన్ని అందుకుంది. రొమాంటిక్‌ కామెడీ ఎంటర్‌టైనర్‌గా హరీశ్ శంకర్ దీన్ని తెరకెక్కించాడు. ఇందులో చిరు పాట ‘గువ్వా గోరింక రీమిక్స్‌ యువతను ఆకట్టుకుంది.
‘స్టైలిష్‌ స్టార్‌’తో ‘డీజే’ మోగించాడు
అల్లు అర్జున్‌ బ్రాహ్మణుడిగా విభిన్న పాత్రలో నటించి మెప్పించిన చిత్రం 'డీజే : దువ్వాడ జగన్నాథమ్‌'. 2017లో వచ్చిన ఈ చిత్రం వెండితెరపై అలరించింది. బన్ని నటన, కామెడీ టైమింగ్‌, హరీశ్ శంకర్ టేకింగ్‌, పూజా హెగ్డే అందాలు సినిమాను విజయ పథంలో నడిపాయి. సామాన్యుడిగా ఉంటూ అన్యాయాలను ఎదురించటానికి డీజేగా బన్ని నటన ప్రేక్షకులను మెప్పించిందీ చిత్రం. దేవిశ్రీ పాటలు శ్రోతలను ఉర్రూతలూగించాయి.