సినిమాలు... మనిషి జీవితాన్ని తెరపై ప్రతిబింబిస్తాయి. మనలోని అంతర్మథనానికి, సంఘర్షణలకు ప్రతీకలుగా నిలుస్తాయి. నవ్విస్తూ....ఏడిపిస్తూ ఓ విడదీయలేని బంధాన్ని పెనవేసుకుంటాయి. అంతటి ప్రాధాన్యత కలిగిన సినిమాల్లో కొన్ని మాత్రం చిరస్థాయిగా నిలిచిపోతాయి. అలాంటి చిత్రమే "నువ్వే కావాలి". అనేక నవ్యమైన, నాణ్యమైన చిత్రాలకు చిరునామాగా నిలిచే ఉషాకిరణ్ మూవీస్... ఈ సినిమాని 21వ శతాబ్దం తొలినాళ్లలో తెరకెక్కించింది. 20ఏళ్ల ప్రయాణం పూర్తైనా.. ఓ పాటగానో, మాటగానో, అంతకుముంచి ఓ మధురానుభూతిగానో ఈ రోజుకీ గుర్తు చేసుకుంటున్నామంటే...తెలుగు ప్రేక్షకుల హదృయాల్లో "నువ్వేకావాలి" ఎంతటి స్థానాన్ని సంపాదించిందో అర్థం చేసుకోవచ్చు.
ఆకట్టుకొనే చిత్రాలతో 90వ దశకాన్ని విజయవంతంగా దాటేసి.... తెలుగు చిత్రపరిశ్రమ ఆర్థికంగా నిలదొక్కుకుంటూ ప్రత్యేకమై స్థానాన్ని సంపాదించుకుంటోన్న రోజులు. కమర్షియల్, మాస్ మసాలాలదే రాజ్యం. అదే సమయంలో 6 పాటలు....3 ఫైట్ల ధోరణిపై మెల్లగా ప్రేక్షకుల్లో విసుగు మొదలవుతూ ఉంది. అప్పుడే మార్పునకు, కొత్తదనానికి ఎప్పుడూ పెద్దపీట వేసే ఉషాకిరణ్ మూవీస్, నూతన శతాబ్దికి ఘనమైన స్వాగతం పలకాలని భావించింది. 1999 చివర్లో మలయాళంలో విడుదలై విజయం సాధించిన "నిరమ్" సినిమా ప్రేరణగా 'నువ్వేకావాలి' చిత్రాన్ని నిర్మించింది. యువతరం ఆలోచనలు, భావోద్వేగాలు, అంతర్మథనం అణువణువునా నిండిపోయిన సున్నితమైన ప్రేమకథ 'నిరమ్' సినిమా. ఆ కథను తెలుగు ప్రేక్షకుల నేటివిటీకి తగినట్టుగా ఉషాకిరణ్ మూవీస్ అందంగా మలిచింది.
త్రివిక్రమ్ పంచ్
నువ్వేకావాలి చిత్రంలో కొత్తనీరు తొణికిసలాడుతూ ఉంటుంది. అందుకే ప్రతి ఫ్రేమ్‌లోనూ నవ్యత కనిపిస్తుంది. స్వయంవరం చిత్రంతో అందరి దృష్టిని ఆకర్షించిన విజయ్ భాస్కర్‌ను ఈ కథకు కెప్టెన్‌గా ఎంపిక చేసుకున్నారు. స్వయంవరం సినిమాకు పనిచేసి ఆ తర్వాత సొంతూరు భీమవరం వెళ్లిపోయిన యువ రచయితకు ఉషాకిరణ్ మూవీస్ నుంచి మళ్లీ రమ్మని కబురు అందింది. తిరిగొచ్చిన అతడు...నీరమ్ సినిమాలోని లైన్ ని మాత్రం తీసుకుని..కథనంలోని యూత్ ఫుల్ నెస్ ఎసెన్స్ ఏ మాత్రం దెబ్బతినకుండా అద్భుతంగా రాశాడు. డైలాగులు, పంచులైన్లు అయితే అదరహో అనేలా కలానికి పదునుపెట్టాడు. అలా 'నువ్వే కావాలి' సంచలన విజయానికి పునాది వేసిన ఆ రచయితే....భవిష్యత్ లో మాటలమాంత్రికుడిగా ప్రేక్షకులను రంజింపజేసే దర్శకుడు త్రివిక్రమ్ శ్రీనివాస్ అవుతాడని ఎవరూ ఊహించి ఉండరు.