విక్టరీ వెంకటేష్ ప్రధాన పాత్రలో తెరకెక్కుతున్న చిత్రం 'నారప్ప'. తమిళ బ్లాక్‌బస్టర్‌ 'అసురన్‌'కు ఇది రీమేక్‌. శ్రీకాంత్‌ అడ్డాల దర్శకుడు. మే 14న థియేటర్లలో కనిపించబోతున్న 'నారప్ప' షూటింగ్ పూర్తి చేసుకున్నట్టు చిత్రబృందం వెల్లడించింది. చివరి రోజుకు సంబంధించి కొన్ని ఫొటోలను నెటిజన్లతో పంచుకుంది.
తమిళంతో పాటు, తెలుగులోనూ క్రేజ్‌ సొంతం చేసుకున్న కథానాయకుడు విశాల్‌. తెలుగు ప్రేక్షకులను దృష్టిలో పెట్టుకుని ఆయన కథలను ఎంపిక చేసుకుంటారు. ఎం.ఎస్‌.ఆనందన్‌ దర్శకత్వంలో ఆయన నటిస్తున్న తాజా చిత్రం 'చక్ర'. శ్రద్ధా శ్రీనాథ్‌ కథానాయిక. రెజీనా కీలక పాత్ర పోషించింది. తెలుగు, తమిళ భాషల్లో ఈ చిత్రాన్ని రూపొందిస్తున్నారు. అన్ని కార్యక్రమాలు పూర్తి చేసుకున్న ఈ సినిమాను ఫిబ్రవరి 19న ప్రేక్షకుల ముందుకు తీసుకొస్తున్నట్టు చిత్రబృందం ప్రకటించింది.
వెంకటేష్-వరుణ్ తేజ్ కలిసి నటిస్తోన్న చిత్రం 'ఎఫ్ 3'. ఈ సినిమా షూటింగ్ శరవేగంగా జరుపుకొంటోంది. ఇప్పుటికే చిత్రీకరణలో వెంకీ, వరుణ్ పాల్గొనగా.. ప్రస్తుతం నటి తమన్నా వచ్చి చేరింది. ఈ విషయాన్ని దర్శకుడు అనిల్ రావిపూడి ట్విట్టర్లో ఫొటోను షేర్ చేశారు.