'ఇస్మార్ట్ శంకర్'లో పక్కా తెలంగాణ అమ్మాయి పాత్రలో కనిపిస్తానని.. ఈ సినిమాతో తెలుగు ప్రేక్షకుల మనసుల్లో నా స్థానాన్ని మరింత సుస్థిరం చేసుకుంటానని నభా నటేష్ చెప్పింది. ఆమె కథానాయికగా నటించిన చిత్రం 'ఇస్మార్ట్ శంకర్'. పూరి జగన్నాథ్ దర్శకుడు. ఈ చిత్రం శుక్రవారం విడుదల కానుంది. ఈ సందర్భంగా నభా నటేష్ శనివారం హైదరాబాద్‌లో విలేకర్లతో మాట్లాడింది.
"తెలుగులో నా తొలి చిత్రం 'నన్ను దోచుకుందువటే' మంచి గుర్తింపు తీసుకొచ్చింది. 'ఇస్మార్ట్ శంకర్'లో పక్కా తెలంగాణ అమ్మాయిగా కనిపిస్తా. ఈ పాత్ర కోసం తెలంగాణ భాష నేర్చుకున్నా. నేను నేర్చుకున్నా తెలుగు డబ్బింగ్‌ చెప్పడానికి సరిపోదు. అందుకే ఈ సినిమా కోసం డబ్బింగ్‌ చెప్పలేకపోయాను. కథ ప్రకారం చాందిని.. శంకర్‌తో ప్రేమలో పడుతుంది. ఆ పిచ్చి ప్రేమతో కోపాన్ని ఆపుకోలేక తరచూ శంకర్‌ని కొడుతుంది. పూరి సినిమాలో నటించడం ఓ వరం లాంటిది. నేనూ నిధి అగర్వాల్‌ కలిసి నటించిన సన్నివేశం ఒక్కటీ లేదు. ఓ పాటలో మాత్రం తనతో కలసి డాన్స్‌ చేశానంతే" అని తెలిపింది.