అటు కరోనా తగ్గుముఖం పడుతోంది.. ఇటు సినిమాల సందడి మొదలవుతోంది. ఇప్పటికే తెలంగాణలో థియేటర్ల పునఃప్రారంభానికి రాష్ట్ర ప్రభుత్వం అనుమతులిచ్చింది. తాజాగా నేడు థియేటర్ల ఓపెన్ను సుముఖత వ్యక్తం చేసింది ఏపీ ప్రభుత్వం. అయితే 50 శాతం సామర్థ్యంతోనే నిర్వహించాలని ఆదేశించింది. దీంతో థియేటర్లలో ప్రేక్షకులు ఈలలు వేసి గోల చేయడమే తరువాయి! చాలా కాలంగా థియేటర్‌ ఎక్స్‌పీరియన్స్‌ మిస్‌ అవుతున్న సినీప్రియులు ఎప్పుడెప్పుడు సినిమాలు విడుదలవుతాయా అని ఎదురుచూస్తున్నారు. ప్రేక్షకుల ఎదురు చూపులకు తగ్గట్టుగానే సినిమాలూ విడుదలకు సై అంటున్నాయి. ఈ నేపథ్యంలో శుక్రవారం కొన్ని సినిమాలు థియేటర్లలో సందడి చేయనున్నాయి. అటు ఓటీటీల్లోనూ కొన్ని విడుదల కానున్నాయి. అవేంటో ఓసారి చూద్దాం..
ఇష్క్
'ఇష్క్' అంటారు.. ప్రేమ కథ కాదంటారు.. ఏంటో వీళ్ల వ్యవహారం. అది ఏంటో తెలియాలంటే జూలై 30న విడుదలయ్యే 'ఇష్క్'.. (నాట్‌ ఎ లవ్‌ స్టోరీ) చూడాల్సిందే. తేజ సజ్జా, ప్రియా ప్రకాశ్‌ వారియర్‌ జంటగా తెరకెక్కిన ఈ సినిమాను ఎస్.ఎస్.రాజు దర్శకత్వంలో తెరకెక్కించారు. ఆర్‌.బి.చౌదరి సమర్పణలో ఎన్‌.వి.ప్రసాద్‌, పరాస్‌ జైన్‌, వాకాడ అంజన్‌కుమార్‌ నిర్మించారు. ఈ చిత్రానికి మహతి స్వరసాగర్‌ సంగీతం అందించారు.