ఏటా సెప్టెంబరులో సినిమాల జోరు కాస్త తక్కువగా ఉన్నప్పటికీ విడుదలైన వాటిలో కనీసం మంచి విజయాలైనా ఉంటాయి. గతేడాదితో పోలిస్తే ఈ సారి పెద్దగా ఆడలేదనే చెప్పాలి. డబ్బింగ్ చిత్రాలతో కలిపి డజనుకుపైగా విడుదలైతే 'గద్దలకొండ గణేష్' మినహా మిగతావి చెప్పుకోదగ్గ స్థాయిలో ప్రేక్షకాదరణ దక్కించుకోలేకపోయాయి.
అంచనాలు అందుకోలేకపోయిన సాహో..
సెప్టెంబరు మొదటివారంలో ఏకంగా 7 సినిమాలు థియేటర్లలోకి వచ్చాయి. ఆగస్ట్ 30న సాహో రిలీజ్ కావడం వల్ల ఫస్ట్వీక్లో పెద్ద చిత్రాలేవి కనిపించలేదు. వసూళ్లు సాధించినప్పటికీ ఫ్లాప్ టాక్ తెచ్చుకుందీ చిత్రం. ఈ వారంలో విడుదలైన ఏడింటిలో జోడీ మాత్రమే కాస్త తెలిసిన చిత్రం. ఆది సాయికుమార్, జెర్సీ ఫేం శ్రద్ధా శ్రీనాథ్ జంటగా నటించిన ఈ సినిమా పెద్దగా ఆడలేదు. ఉండిపోరాదే, దర్పణం, 2 అవర్స్ లవ్, వీడే సరైనోడు, నీకోసం, తారామణి.. లాంటి చిత్రాలన్నీ ఎలాంటి చడీచప్పుడు చేయకుండా ఇలా వచ్చి అలా వెళ్లిపోయాయి.
టాక్ బాగున్నా.. కలెక్షన్లు వీక్..
రెండో వారంలో 'గ్యాంగ్లీడర్'తో నాని సందడి చేశాడు. విక్రమ్ కె కుమార్ తెరకెక్కించిన ఈ సినిమాలో కొత్తదనం ఆశించిన ప్రేక్షకులు నిరాశకు లోనయ్యారు. టాక్ బాగున్నా.. వసూళ్లు మాత్రం సాధించలేకపోయింది. తెలుగు రాష్ట్రాల్లో రూ.21 కోట్ల రూపాయల ప్రీ-రిలీజ్ బిజినెస్ చేసిన ఈ సినిమా అనుకున్న కలెక్షన్లు సాధించలేకపోయింది.
పసలేని పహిల్వాన్..
సుదీప్ హీరోగా నటించిన 'పహిల్వాన్' సినిమాను పాన్-ఇండియా మూవీగా ప్రమోషన్ నిర్వహించారు. అయితే ఈ చిత్ర సగటు కన్నడ సినిమా కంటే దిగువస్థాయిలో ఉంది. తెలుగులో ఈ సినిమా ఫ్లాప్ టాక్ తెచ్చుకుంది. శ్రీకాంత్ విలన్ గా నటించిన మార్షల్ సినిమా కూడా ఏమాత్రం ఆకట్టుకోలేకపోయింది.