మాలీవుడ్‌ స్టార్ మమ్ముట్టి తనకు తానే ఛాలెంజ్‌ విసురుకున్నారు. లాక్డౌన్, కొవిడ్-19 నిబంధనల నేపథ్యంలో వీలైనన్ని రోజులు ఇంట్లోనే గడపాలని దృఢంగా నిశ్చయించుకున్నారు. మార్చి నుంచి తన నివాసాన్ని వదిలి బయటికి రాకపోవడం విశేషం. దాదాపు తొమ్మిది నెలల తర్వాత (275 రోజులు) ఆయన ఇంటి నుంచి అడుగు బయట పెట్టారు. డిసెంబరు 5న సాయంత్రం వేళ స్నేహితులు, దర్శకుడు ఆంటో జోసెఫ్‌, ప్రొడక్షన్‌ కంట్రోలర్‌ బాదుషా, నటుడు రమేశ్‌తో కలిసి సరదాగా బయటికి వెళ్లి ఛాయ్ తాగారు. కలూర్‌ స్టేడియం వద్ద వీరు ఉండగా తీసిన వీడియో సోషల్‌ మీడియాలో వైరల్‌గా మారింది.
కొడుకు మెప్పు...
ఈ ఏడాది ఆరంభంలో మమ్ముట్టి తన తర్వాతి సినిమా 'ప్రేయిస్ట్‌' తొలి షెడ్యూల్‌ పూర్తి చేసుకున్నారు. ఆ తర్వాత కేరళలోని కొత్త ఇంటికి షిఫ్ట్‌ అయ్యారు. మార్చిలో లాక్డౌన్ విధించిన తర్వాత కనీసం నిత్యావసర సరకుల కోసమూ ఇల్లు వదిలి బయటికి వెళ్లలేదు. తన తండ్రి మమ్ముట్టి ఇలా దృఢంగా ఉండటాన్ని ఆయన కుమారుడు, హీరో దుల్కర్‌ సల్మాన్‌ ప్రశంసించారు. లాక్‌డౌన్‌లో ఆయన తనకు తాను ఛాలెంజ్‌ విసురుకున్నారని తెలిపారు.