Mohan babu trolling: సోషల్‌మీడియాలో వచ్చే ట్రోలింగ్స్‌పై నటుడు మోహన్బాబు షాకింగ్‌ కామెంట్స్‌ చేశారు. ఓ ఇద్దరు హీరోలే ఈ ట్రోలింగ్స్‌ చేయిస్తున్నారని ఆయన అన్నారు. 'సన్ ఆఫ్ ఇండియా' ప్రమోషన్స్‌తో బిజీగా ఉన్న ఆయన ఓ ఛానెల్‌కు ఇంటర్వ్యూ ఇచ్చారు. ఇందులో పలు ఆసక్తికర అంశాలపై మాట్లాడారు. దర్శకుడు రత్నబాబు కథ చెప్పిన వెంటనే తనకు బాగా నచ్చేసిందని తెలిపారు. 'సన్ ఆఫ్ ఇండియా' ఓ మంచి కథ అని, సినిమా చూసిన ప్రేక్షకులకు తప్పకుండా నచ్చుతుందని పేర్కొన్నారు.
"ఓసారి రత్నబాబు నన్ను కలిసి 'సన్ ఆఫ్ ఇండియా' కథ చెప్పారు. కుల వ్యవస్థ, రాజకీయం.. ఇలా చెప్పుకుంటూ వెళితే ఎన్నో కీలక అంశాలను ఈ సినిమాలో చూపించాం. ఒక రాజకీయ నాయకుడి కారణంగా ఓ అమాయకుడైన వ్యక్తి ఎలా ఇబ్బందులు ఎదుర్కొన్నాడు? అన్యాయంగా ఎలా జైలుకు వెళ్లాడు?.. ఇలాంటి ఎన్నో అంశాలపై ఈ చిత్రాన్ని తీర్చిదిద్దాం. భారతదేశంలో ఎంతోమంది చేయని తప్పుకు జైల్లో శిక్ష అనుభవిస్తున్నారు. అదే విషయాన్ని ఈ సినిమాలో చూపించాం. ప్రైవేటు జైలు అనే కొత్త కాన్సెప్ట్‌ను ఈ సినిమాలో చూపించాం" అని మోహన్బాబు చెప్పారు.