'పోలీసు బిడ్డగా వారికి చేతులెత్తి సెల్యూట్​ చేస్తున్నా'

కరోనా మహమ్మారిపై ముందుండి పోరాడుతున్న పోలీసులకు సెల్యూట్​ చేస్తున్నానని చెప్పారు మెగాస్టార్ చిరంజీవి. వారు ప్రాణాలకు తెగించి లాక్​డౌన్​ను పటిష్ఠంగా అమలు చేస్తున్నందునే వైరస్​ వ్యాప్తి అదుపులోకి వచ్చిందని కొనియాడారు.

తెలుగు రాష్ట్రాల్లో కరోనా వైరస్​ కట్టడి కోసం పోలీసులు చేస్తున్న కృషి అద్భుతమని కొనియాడారు ప్రముఖ కథానాయకుడు మెగాస్టార్ చిరంజీవి. పోలీసుల వల్లే ఈ వైరస్​ విజృంభణ చాలా వరకు అదుపులోకి వచ్చిందని చెప్పారు.

లాక్​డౌన్​ అమలులో సామాన్య ప్రజలంతా పోలీసులకు సహకరించాలని విజ్ఞప్తి చేస్తూ ట్విట్టర్​లో ఓ వీడియో పంచుకున్నారు చిరంజీవి.

"కరోనా కట్టడి కోసం దేశం సాగిస్తున్న సమరంలో సైనికుల్లా ప్రాణాలకు తెగించి ముందుండి పోరాడుతున్న వారిలో పోలీసులదీ కీలక పాత్రే. ఈ క్లిష్ట సమయాల్లో రేయింబవళ్లు ఎంతో అంకిత భావంతో విధులు నిర్వర్తిస్తున్నారు. అందుకే వారి సేవలకు ఓ పోలీసు బిడ్డగా సెల్యూట్ చేస్తున్నా.

రెండు తెలుగు రాష్ట్రాల పోలీసుల పనితీరు అద్భుతం. నిద్రాహారాలు మాని వాళ్లు పడుతున్న కష్టం అంతా ఇంతా కాదు. వాళ్ల పనితీరు వల్లే లాక్​డౌన్​ విజయవంతంగా అమలవుతోంది. దీని ఫలితంగానే కరోనా వ్యాప్తి చాలా వరకు అదుపులోకి వచ్చింది. ఈ మహమ్మారిని అంతమొందించడంలో అందరూ పోలీసులకు సహకరించాలని కోరుతున్నా."

-చిరంజీవి

నేను సైతం...

కరోనా విషయంలో ప్రజల్ని అప్రమత్తం చేసేందుకు ఎప్పటికప్పుడు తన వంతు ప్రయత్నం చేస్తున్నారు చిరంజీవి. లాక్​డౌన్​తో షూటింగ్​లు నిలిచిపోయి, ఉపాధి కోల్పోయిన కార్మికులకు అండగా నిలిచేందుకూ ముందుకొచ్చారు. 'కరోనా క్రైసిస్ ఛారిటీ మనకోసం' పేరుతో ప్రత్యేక కమిటీని ఏర్పాటు చేసి సహాయక కార్యక్రమాలు చేపడుతున్నారు. కార్మికుల సంక్షేమం కోసం చిరంజీవి కోటి రూపాయలు విరాళం ప్రకటించగా... ఇతర నటులు ఆయన బాటలోనే తమ వంతు సాయం అందించారు.

ఇలా సేకరించిన నిధులతో సినీ కార్మికులకు అవసరమైన రేషన్ సామగ్రిని పంపిణీ చేస్తున్నారు కమిటీ సభ్యులు.