మెగాస్టార్ చిరంజీవి.. ఆరు పదుల వయసు దాటిన ఆయనలో అదే జోరు, అదే ఉత్సాహం. అందుకే ఇప్పటికీ సినిమాల విషయంలో చిరు దూకుడు ఏ మాత్రం తగ్గలేదు. 'ఖైదీ నంబర్ 150'తో బాక్సాఫీస్ బద్దల కొడుతూ రీఎంట్రీ ఇచ్చిన ఆయన ఆ తర్వాత 'సైరా నరసింహారెడ్డి'తో దుమ్మురేపారు. ప్రస్తుతం 'ఆచార్య'లో నటిస్తూనే.. యువ హీరోల కన్నా జోరుగా కొత్త సినిమాలను ఓకే చేస్తూ అభిమానుల్లో జోష్ నింపుతున్నారు. ఇవాళ మెగాస్టార్ పుట్టినరోజు సందర్భంగా ఆయన కొత్త సినిమాలకు సంబంధించి వరుస సర్ప్రైజ్లతో ఫ్యాన్స్కు ఫుల్ కిక్ ఇచ్చారు మేకర్స్. ఈ నేపథ్యంలో చిరు నటించే సినిమాలు ఏంటి? ఈరోజు వచ్చిన అప్డేట్స్ ఎంటో చూద్దాం..
దర్శకుడు మోహన్ రాజా దర్శకత్వంలో చిరు 'లూసిఫర్' రీమేక్ చేయనున్నారు. దీనికి 'గాడ్ ఫాదర్'గా టైటిల్ ప్రకటిస్తూ మోషన్ పోస్టర్ను శనివారమే విడుదల చేసింది చిత్రబృందం. ఇది ఫ్యాన్స్ను బాగా అలరించింది.
మెహర్ రమేష్-చిరు కలయికలో రానున్న సినిమా టైటిల్ను 'భోళా శంకర్'గా ప్రకటించారు. ఇందులో హీరోయిన్ కీర్తిసురేష్.. మెగాస్టార్కు చెల్లిలిగా నటించనుంది. ఇవాళ రాఖీ పండగ సందర్భంగా కీర్తి.. చిరుకు రాఖీ కడుతున్న వీడియోను పోస్ట్ చేసింది చిత్రబృందం. ఇది చూసిన అభిమానుల ఆనందానికి అవధులు లేకుండా పోయాయి. ప్రస్తుతం ఈ వీడియో నెట్టింట్లో ట్రెండింగ్గా ఉంది.