సమయానికి అంబులెన్స్ అందుబాటులో లేకపోవడం వల్ల ప్రాణాలు కోల్పోయిన సంఘటనలు చాలానే చూశాం. సామాన్య ప్రజానీకానికే కాకుండా ఓ మరాఠీ నటికీ అదే దుస్థితి ఏర్పడింది. మహారాష్ట్రకు చెందిన టీవీ నటి పూజ జుంజర్ అంబులెన్స్సమయానికి రాకపోవడం వల్ల మరణించింది. అప్పుడే జన్మించిన ఆమె శిశువు కూడా మృతిచెందింది. ఆదివారం జరిగిన ఈ సంఘటన ఆలస్యంగా వెలుగులోకి వచ్చింది.
మహారాష్ట్ర హింగోలీ జిల్లాలోని గోరేగావ్ ప్రాథమిక హెల్త్ సెంటర్లో ఆదివారం తెల్లవారుజామున 2 గంటలకు పూజ ఓ శిశువుకు జన్మనిచ్చింది. పుట్టిన కొద్దిసేపటికే ఆ శిశువు ప్రాణాలు కోల్పోయింది. మెరుగైన వైద్యం కోసం నటిని హింగోలీలో ఆసుపత్రికి తరలించాలని సూచించారువైద్యులు.
ఆ ఆసుపత్రి దాదాపు 40 కిలోమీటర్ల దూరంలో ఉంది. ప్రభుత్వ అంబులెన్స్ లేకపోవడం వల్ల ఆలస్యం జరిగింది. తర్వాత ఓ ప్రైవేటు అంబులెన్స్లో ఆసుపత్రికి బయలుదేరగా.. మార్గ మధ్యలోనే ఆమె మృతి చెందింది. ఉదయం 6:30 గంటల ప్రాంతంలో ఈ సంఘటన జరిగింది. ప్రసవం కోసం సొంత ఊరు గోరేగావ్కు వచ్చిన పూజా... ఈ విధంగా అకాల మరణం చెందడం గ్రామస్థులను కలచి వేస్తోంది.
ఈ ఘటనపై మెడికో లీగల్ కేసు నమోదు చేసిన పోలీసు దర్యాప్తు ప్రారంభించారు. పూజా మరాఠీలో రెండో చిత్రాల్లో నటించింది. గర్భం దాల్చిన కారణంగా సినిమాలకు బ్రేక్ తీసుకుంది. మహారాష్ట్ర అసెంబ్లీ ఎన్నికల పోలింగ్ జరిగిన అక్టోబరు 21నే ఈ సంఘటన జరగడం గమనార్హం.
ఇదీ చదవండి: బుసలు కొట్టే అందం.. మల్లిక సొంతం..!
