Mahesh Babu: కొవిడ్ కారణంగా సోదరుడు రమేశ్ బాబు కడచూపునకు మహేశ్ బాబు దూరమయ్యారు. తనతోపాటు తన పిల్లలు కూడా రమేశ్ బాబుకు అంతిమ వీడ్కోలు పలకలేకపోయారు. అయితే ఇంటి నుంచే వాట్సాప్ కాల్ ద్వారా అన్నను కడసారి చూసి కన్నీటి వీడ్కోలు పలికినట్లు తెలుస్తోంది. సోదరుడు రమేశ్ హఠాన్మరణం పట్ల ఎంతో భావోద్వేగానికి గురైన మహేశ్.. ట్విట్టర్ వేదికగా రమేశ్ బాబుతో ఉన్న అనుబంధాన్ని గుర్తుచేసుకుంటూ తుది వీడ్కోలు పలికారు.
రమేశ్ బాబు లేకుంటే తాను ఇప్పుడు ఈ స్థితిలో ఉండేవాడిని కాదని మహేశ్ వ్యాఖ్యానించారు. "తనే (రమేశ్ బాబు) నాకు స్ఫూర్తి, బలం, ధైర్యం, సర్వస్వం. నాకు మరో జన్మంటూ ఉంటే రమేశ్ బాబే అన్నయ్యగా ఉండాలి" అంటూ ఉద్వేగానికి లోనయ్యారు మహేశ్. తన కోసం ఎంతో చేసిన రమేశ్ బాబుకు ధన్యవాదాలు తెలిపిన మహేశ్.. ఎల్లప్పుడు రమేశ్ను ప్రేమిస్తూనే ఉంటానని ట్విట్టర్ వేదికగా సోదరుడిపై ప్రేమను చాటుకున్నారు.