రివ్యూ 2019: స్టార్ నటులు మృతి.. అభిమానుల్లో విషాదం

ఈ ఏడాది టాలీవుడ్​కు చెందిన పలువురు ప్రముఖ నటులు తుదిశ్వాస విడిచారు. అభిమానులకు తీరనిశోకం మిగిల్చారు. వారి గురించే ఈ కథనం.

ఈ ఏడాది.. ఎన్నో జ్ఞాపకాలతో పాటు కొన్ని చేదు వార్తల్ని మిగిల్చింది. టాలీవుడ్​లో పలువురు ప్రముఖలు ఈ సంవత్సరంలోనే తుదిశ్వాస విడిచారు. ఎన్నో మరపురాని చిత్రాల్లో నటించిన వారు.. అభిమానులను శోకసంద్రంలో ముంచేశారు. ఈ జాబితాలో సీనియర్ నటి అంజలి దేవి, దర్శకురాలు విజయ నిర్మల, దర్శకుడు కోడి రామకృష్ణ, నటులు రాళ్లపల్లి నరసింహారావు, గొల్లపూడి మారుతీరావు, వేణు మాధవ్ తదితరులు ఉన్నారు.

గొల్లపూడి మారుతీరావు-నటుడు, రచయిత

టాలీవుడ్​లో ఎన్నో అద్భుతమైన పాత్రలకు ప్రాణం పోసిన గొల్లపూడి మారుతీరావు.. డిసెంబర్ 12న కన్నుమూశారు. మెగాస్టార్ చిరంజీవి 'ఇంట్లో రామయ్య వీధిలో కృష్ణయ్య'తో నటుడిగా వెండితెరకు పరిచయమయ్యారు. కెరీర్​లో ఆరు నంది అవార్డులు సొంతం చేసుకున్నారు.

గొల్లపూడి మారుతీరావు

కోడి రామకృష్ణ-దర్శకుడు

తెలుగు సినిమా స్థాయిని పెంచిన శతచిత్రాల దర్శకుడు కోడి రామకృష్ణ.. జూన్ 22న తుదిశ్వాస విడిచారు. 90ల‌లో ఎన్నో హిట్ చిత్రాలు తెర‌కెక్కించిన ఈ డైరెక్టర్.. అప్పటి స్టార్ హీరోలందరితో సినిమాలు చేశారు. కుటుంబ కథా చిత్రాలు తీస్తూనే.. 'అమ్మోరు', 'దేవి', 'దేవీపుత్రుడు', 'అంజి', 'అరుంధతి' వంటి ఫాంటసీ సినిమాలను తెలుగు ప్రేక్షకులకు అందించారు.

దర్శకుడు కోడి రామకృష్ణ

వేణు మాధవ్-హాస్య నటుడు

ప్రముఖ హాస్యనటుడు వేణుమాధవ్.. సెప్టెంబర్ 25న మృతి చెందాడు. కాలేయ సంబంధిత వ్యాధితో బాధపడుతూ 39 ఏళ్ల వయసులో తుదిశ్వాస విడిచాడు. మిమిక్రీ ఆర్టిస్టుగా తన ప్రయాణాన్ని మొదలుపెట్టిన వేణుమాధవ్.. తెలుగు ప్రేక్షకులు మెచ్చిన హాస్యనటుడిగా ఎదిగాడు.

హాస్య నటుడు వేణు మాధవ్

విజయనిర్మల-దర్శకురాలు

ప్రముఖ నటి, దిగ్గజ దర్శకురాలు, సూపర్ స్టార్ కృష్ణ సతీమణి విజయనిర్మల (73).. ఈ ఏడాది జూన్ 27న కన్నుమూశారు. తెలుగు, తమిళ, మలయాళ భాషల్లో 200కుపైగా చిత్రాల్లో నటించిన ఈమె.. 44 చిత్రాలకు దర్శకత్వం వహించి, ప్రపంచంలోనే అత్యధిక సినిమాలు రూపొందించిన తొలి మహిళా దర్శకురాలిగా 2002లో గిన్నీస్​బుక్‌లో చోటు సంపాదించారు.

దర్శకురాలు విజయనిర్మల

సీనియర్ నటి గీతాంజలి

సీనియర్‌ నటి గీతాంజలి.. అక్టోబర్ 31న గుండెపోటుతో మరణించారు. దిగ్గజ ఎన్టీఆర్‌ దర్శకత్వంలో ఆయనే కథానాయుడిగా నటించిన 'సీతారాముల కల్యాణం' ద్వారా వెండితెరకు పరిచమయ్యారు. కెరీర్​ మొత్తంలో 500కు పైగా చిత్రాల్లో నటించారు.

సీనియర్ నటి అంజలి దేవి

శివప్రసాద్-మాజీ ఎంపీ, నటుడు

సినీ నటుడు, చిత్తూరు మాజీ ఎంపీ, టీడీపీ సీనియర్ నాయకుడు నారమల్లి శివప్రసాద్‌ సెప్టెంబర్ 21న కన్నుమూశారు. ఇటు సినిమాల్లోనూ అటు రాజకీయాల్లోనూ తనకంటూ ప్రత్యేక స్థానాన్ని ఏర్పరుచుకున్నారు.

సీనియర్ నటుడు శివప్రసాద్

రాళ్లపల్లి నరసింహారావు-నటుడు

సీనియర్ నటుడు రాళ్లపల్లి నరసింహారావు (73).. మే 17న కన్నుమూశారు. నాటక రంగం నుండి వచ్చిన ఆయన.. సుమారు 8 వేల నాటకాల్లో నటించారు. 850కి పైగా చిత్రాల్లో కనిపించారు.

రాళ్లపల్లి నరసింహారావు

అనిల్ కుమార్-నిర్మాత

టాలీవుడ్​ నిర్మాత అనిల్ కుమార్.. ఏప్రిల్ 26న కన్నుమూశారు. 'రాధా గోపాలం', 'అల్లరి బుల్లోడు', 'శ్రీరామచంద్రులు', 'ఒట్టేసి చెబుతున్నా' వంటి చిత్రాల‌ను నిర్మించారు. హీరో నాని అసిస్టెంట్ డైరెక్టర్‌గా ప‌నిచేసిన స‌మ‌యంలో అనిల్ కుమార్ నుంచి తొలి జీతం అందుకున్నాడు.

నిర్మాత అనిల్ కుమార్