టాలీవుడ్‌ నటి సమంత ‘ఏమాయ చేసావే’ చిత్రంతో సినీ పరిశ్రమలోకి అడుగుపెట్టిన సంగతి తెలిసిందే. ఈ చిత్రం శనివారంతో 11 వసంతాలను పూర్తి చేసుకుంది. అదేవిధంగా సమంత కూడా తన 11వ సినీ వార్షికోత్సవాన్ని జరుపుకుంటోంది. ఈ సందర్భంగా ఆ చిత్రంలోని కొన్ని ఫొటోలను, ఒక వీడియోని పోస్ట్‌ చేసింది. ‘ఏమాయ చేసావే విడుదలై 11 సంవత్సరాలైంది. ఎలాంటి అనుభవం లేకున్నా ఈ చిత్రంలో హీరోయిన్‌గా ఎంపిక చేసిన గౌతమ్‌ వాసుదేవ్‌ మేనన్‌ గారికి ధన్యవాదాలు. అలాగే ఈ చిత్ర నిర్మాత మంజులా ఘట్టమనేని గారికి, హీరో చైతన్యకి ధన్యవాదాలు. అంతేకాదు.. ఈ పోస్ట్‌ చదువుతున్న మీకు కూడా థ్యాంక్యూ. మీ వల్లే నేను ప్రపంచంలోనే సంతోషమైన మహిళగా ఉండగలుగుతున్నాను’ అని చెప్పుకొచ్చింది.
కోరిక నెరవేరింది..
నటి హిమజ హీరో పవన్‌ కళ్యాణ్‌తో దిగిన ఫొటోలని పోస్ట్‌ చేసింది. ఈ సందర్భంగా‘ఓ మై గాడ్‌.. ఈ రోజుకి నా కోరిక నెరవేరింది. పవన్‌ కళ్యాణ్‌ గారిని తొలిప్రేమ చిత్రంలో చూసినప్పుడు కనీసం ఆయనను ప్రత్యక్షంగా చూస్తానా? అనుకున్నా.. ప్రస్తుతం ఆయన 27వ సినిమాలో నటించే అవకాశం వచ్చింది. ఈ అవకాశం ఇచ్చిన డైరెక్టర్ క్రిష్‌ గారికి ధన్యవాదాలు. మీతో పనిచేయడం నా అదృష్టం’ అని రాసుకొచ్చింది.
ఏడాది తర్వాత..
బాలీవుడ్‌ ఫిట్‌నెస్‌ ఫ్రీక్‌ బిపాసా బసు దంపతులు మాల్దీవుల్లో విహరిస్తున్నారు. ఈ సందర్భంగా ‘దాదాపు సంవత్సరం తర్వాత మాల్దీవులకు వచ్చాం.. ఇక్కడి అందాలు మాలో కొత్త ఉత్తేజాన్ని కలిగించాయి’ అంటూ అక్కడి జ్ఞాపకాలను అభిమానులతో పంచుకుంది.
అప్పుడు పసిపాప..
బాలీవుడ్‌ నటి కరీనా కపూర్‌ ఇటీవలే రెండోసారి పండంటి బాబుకి జన్మనిచ్చిన సంగతి తెలిసిందే. ఈ సందర్భంగా తన సోదరి కరిష్మా.. కరీనా పసిపాపగా ఉన్నప్పటి ఫొటోని పోస్ట్‌ చేస్తూ ‘ఇది నా సోదరి చిన్నప్పటి ఫొటో. అప్పుడు తను పసిపాప. ఇప్పుడు రెండోసారి మాతృత్వాన్ని పొందింది’ అంటూ సోదరికి శుభాకాంక్షలు తెలిపింది.