హాలీవుడ్ ఎంట్రీ ఇస్తోన్న మురుగదాస్!

విభిన్న చిత్రాల దర్శకుడు ఏఆర్​ మురుగదాస్​.. హాలీవుడ్​ అరంగేట్రం చేయనున్నారని సమాచారం. ప్రముఖ నిర్మాణ సంస్థ వాల్ట్​డిస్నీతో కలిసి యాక్షన్​ కథాంశంతో చిత్రాన్ని తెరకెక్కించడానికి సన్నాహాలు చేస్తున్నారని ప్రచారం జరుగుతోంది.

భారత్​లో రూపొందుతోన్న ఎన్నో సినిమాలు హాలీవుడ్​ చిత్రాలకు పోటీగా నిలిచాయి. ఇంగ్లీష్​ సినిమాలకు పోటీనిచ్చే విధంగా మన దర్శకులు అలాంటి సాంకేతిక, కథతో చిత్రపరిశ్రమను గర్వించేలా చేస్తున్నారు. రాజమౌళి, శంకర్​ వంటి విలక్షణ దర్శకులు ప్రపంచం మన సినీపరిశ్రమ వైపు తొంగిచూసేలా సినిమాలను తెరకెక్కిస్తున్నారు. కానీ, ఈ డైరెక్టర్లు ఎప్పుడూ హాలీవుడ్​లో పనిచేయడానికి మాత్రం ఆసక్తి చూపలేదు. ఈ నేపథ్యంలో హాలీవుడ్​లో ఓ సినిమా రూపొందించేందుకు ఓ ప్రముఖ దర్శకుడు రంగం సిద్ధం చేసుకుంటున్నారని సమాచారం.

తమిళ, తెలుగు ప్రేక్షకులకు ఎంతో దగ్గరైన దర్శకుడు ఏఆర్​ మురుగదాస్​ త్వరలోనే హాలీవుడ్​లో ఓ సినిమాను తెరకెక్కించనున్నారని కోలీవుడ్​ వర్గాలు అంటున్నాయి. ప్రముఖ హాలీవుడ్ నిర్మాణ సంస్థ వాల్ట్​డిస్నీతో మురుగదాస్​ ఒప్పందం కుదుర్చుకున్నారని సమాచారం. యాక్షన్​ కథాంశంతో చిత్రాన్ని రూపొందిస్తారని ప్రచారం జరుగుతోంది. అయితే ఈ వార్తల్లో నిజమెంతో తెలియాలంటే అధికారిక ప్రకటన వచ్చేంత వరకు ఎదురుచూడాల్సిందే.

ఇదీ చూడండి:బరువు తగ్గినందుకు గిఫ్ట్​గా లగ్జరీ కారు