యశ్​ సినిమాలో హీరోయిన్​గా​ మిల్కీబ్యూటీ!

కన్నడ హీరో యశ్.. కొత్త సినిమాలో తమన్నా కథానాయికగా నటించనుందట. ఇంతకు ముందు ఈ భామ.. 'కేజీఎఫ్'లో ప్రత్యేక గీతంతో మెప్పించింది.

ప్రాంతీయ సినిమాగా ప్రేక్షకుల ముందుకొచ్చిన 'కేజీఎఫ్​'.. దేశవ్యాప్తంగా సంచలన విజయం సాధించింది. ఇందులో హీరోగా నటించిన కన్నడ నటుడు యశ్..​ క్రేజ్​ అమాంతం పెరిగిపోయింది. ప్రస్తుతం ఇతడు 'కేజీఎఫ్' రెండో భాగంలో నటిస్తున్నాడు. అయితే యశ్ నటించబోయే తర్వాతి సినిమాలో హీరోయిన్​గా తమన్నా కనిపించనుందని సమచారం.

ఇంతకు ముందు 'కేజీఎఫ్'లోని ప్రత్యేక గీతంలో తమన్నా.. యశ్​తో కలిసి నర్తించింది. ఇప్పుడు వీరిద్దరూ పూర్తిస్థాయి చిత్రం చేస్తుండటం వల్ల అభిమానుల్లో ఆసక్తి నెలకొంది. నార్తన్​ దర్శకత్వం వహించనున్నాడు. ఇప్పటికే మిల్కీబ్యూటీతో చిత్రబృందం సంప్రదింపులు జరిపిందని, త్వరలో పూర్తి వివరాలు తెలుస్తాయని టాక్. దీనితో పాటే ప్రశాంత్ నీల్ తీస్తున్న 'కేజీఎఫ్‌-2'.. అక్టోబర్‌ 23న ప్రేక్షకుల ముందుకు వచ్చే అవకాశముంది.