మాతృత్వపు అనుభూతి పొందుతున్నా: పెర్రీ

గర్భవతిగా మారిన తర్వాత తన జీవితంలో చాలా మార్పులు వచ్చాయని అంటోంది అమెరికన్​ పాప్​ సింగర్​ కేట్ పెర్రీ. గర్భధారణ తర్వాత తనకు ఎదురైన అనుభవాలను తాజాగా ఆస్ట్రేలియా రేడియో షోలో వెల్లడించింది.

అమెరికన్ పాప్​సింగర్​ కేట్ పెర్రీ.. తన గర్భధారణకు సంబంధించిన విషయాలపై తాజాగా ఓ ఇంటర్వ్యూలో స్పందించింది. వచ్చే నెలలో జరగనున్న తొలి కాన్పు కోసం ఆమె ఏ విధంగా జాగ్రత్తలు తీసుకుంటుందో వెల్లడించింది. ఆస్ట్రేలియా రేడియో షోలో వర్చువల్​గా పాల్గొన్న కేట్ పెర్రీ.. తన గర్భధారణ జరిగినప్పటి నుంచి అనుభవాలను పంచుకుంది.

ప్రెగ్నెంట్ అయిన తర్వాత తన బరువు 86 కిలోలకు పెరిగినట్లు తెలిపింది పెర్రీ. దీంతో తన చేతులు, పాదాలు లావెక్కాయని.. తాను ఎటు వెళ్లినా చెప్పులు ధరిస్తున్నట్లు చెప్పింది. ఈ క్రమంలో గర్భం దాల్చిన మహిళల పట్ల తనకు ఎంతో గౌరవం పెరిగిందని తెలియజేసింది. అలా ఉండటం వల్ల సరికొత్త దృక్పథాన్ని పొందుతారని స్పష్టం చేసింది.