'ఖైదీ పేరును చెడగొట్టలేదన్న నమ్మకం ఉంది'

తమిళ నటుడు కార్తీ హీరోగా నటించిన 'ఖైదీ'.. ఈ శుక్రవారం ప్రేక్షకుల ముందుకు రానుంది. ఈ సందర్భంగా మీడియాతో మాట్లాడిన ఈ నటుడు సినిమాకు సంబంధించిన పలు విషయాలను పంచుకున్నాడు.

తమిళ నటుడు కార్తీ ప్రధానపాత్రలో నటించిన చిత్రం 'ఖైదీ'. కనకరాజ్ దర్శకత్వం వహించాడు. ఈ శుక్రవారం విడుదలవుతోంది. ఈ సినిమా ప్రచారంలో భాగంగా మీడియాతో మాట్లాడిన ఈ నటుడు.. పలు ఆసక్తికర విషయాలు పంచుకున్నాడు.

'ఖైదీ' చిరంజీవిని స్టార్‌గా మార్చిన సినిమా. మళ్లీ అదే పేరు మీ చిత్రానికి పెట్టుకున్నారు?

ఇది కావాలని పెట్టింది కాదు. ఈ కథకు ఈ టైటిల్‌ సరిగ్గా సరిపోతుంది. ఖైదీ, ఖైదీ నెం.786, ఖైదీ నెం.150.. ఇలా చిరంజీవిగారు చేసిన సినిమాలన్నీ బాగా ఆడాయి. అందుకే మా చిత్రానికికి 'ఖైదీ' అని పేరు పెట్టగానే ఓ ప్రత్యేక దృష్టితో చూడడం మొదలుపెట్టారు. మేం మంచి సినిమా తీశాం. ఆ పేరు చెడగొట్టలేదన్న నమ్మకం ఉంది.

'ఖైదీ' కథ ఎంచుకోవడానికి కారణం ఏంటి?

పదేళ్ల పాటు బయట ప్రపంచంతో సంబంధం లేకుండా జైలులోనే ఉండిపోయిన ఓ ఖైదీ కథ ఇది. తనకు పదేళ్ల వయసున్న పాప కూడా ఉంటుంది. ఆ పాప ఎక్కడ ఉందో, ఎలా ఉందో తెలియదు. జైలు నుంచి బయటపడిన ఖైదీ ఆ చిన్నారిని వెతుక్కుంటూ చేసిన నాలుగు గంటల ప్రయాణమే ఈ చిత్ర కథాంశం. రాత్రి పూట మాత్రమే చిత్రీకరణ చేశాం. సినిమా అంతా యాక్షన్‌ మూడ్‌లో ఉంటుంది. పైగా తండ్రీ కూతుర్ల మధ్య భావోద్వేగాలు నన్ను బాగా ఆకట్టుకున్నాయి. దర్శకుడు కనకరాజ్‌ కథ చెప్పినట్టే తెరపై చూపించాడు.

ఇవీ చూడండి.. 'రంగమ్మ మంగమ్మ' యూట్యూబ్​లో రికార్డులమ్మ..!