Kareena Kapoor Khan: బాలీవుడ్ క్రేజీ జోడీల్లో సైఫ్ అలీఖాన్, కరీనాకపూర్‌ జంట ముందు వరసలోనే ఉంటుంది. ప్రేమించి పెళ్లి చేసుకున్న ఈ జంట ఇద్దరు సంతానంతో హాయిగా గడిపేస్తున్నారు. 'తషన్‌' సినిమా చిత్రీకరణ సమయంలో కరీనా, సైఫ్ ప్రేమలో పడ్డారు. ఈ సినిమాలో అక్షయ్‌కుమార్‌ నటించారు. ఈ సినిమా షూటింగ్లో కరీనాతో సైఫ్ సన్నిహితంగా ఉండటం గమనించి కరీనాకు దూరంగా ఉండమని సైఫ్‌కు అక్షయ్ చెప్పారట. ఈ జోడీ ప్రేమలో పడిన తొలి రోజుల్లో అక్షయ్‌కుమార్‌, సైఫ్ మధ్య జరిగిన ఆసక్తికర విషయాన్ని ఓ ఇంటర్య్వూలో కరీనా పంచుకుంది. ఆ ఇంటర్య్వూ చేసింది అక్షయ్ సతీమణి ట్వింకిల్‌ ఖన్నా కావడం విశేషం.
"నేనూ, సైఫ్ సన్నిహితంగా ఉండటం గమనించిన అక్షయ్.. సైఫ్‌ను ఓ పక్కకు పిలిచి 'ఈ అమ్మాయిలతో చాలా ప్రమాదం. జాగ్రత్తగా ఉండు' అని హెచ్చరించారు. 'లేదు.. అలాంటిది ఏమీ లేదు. తన గురించి నాకు బాగా తెలుసు' అని సైఫ్ చెప్పారు" అని అప్పటి జ్ఞాపకాన్ని పంచుకుంది కరీనా.