సందర్భమేదైనా సరే తనదైన శైలిలో వివాదాస్పద వ్యాఖ్యలు చేసి వార్తల్లో నిలుస్తుంటుంది బాలీవుడ్ నటి కంగన రనౌత్. ఇటీవల కంగన తప్పుగా చేసిన ఓ ట్వీట్‌ ప్రస్తుతం ఆమెని మరోసారి వివాదాల్లోకి లాగింది. దిల్లీలో రైతుల ఆందోళనను ఉద్దేశిస్తూ కొన్నిరోజుల క్రితం కంగన ఓ ట్వీట్‌ చేసింది. రైతుల ఆందోళనలో పాల్గొన్న ఓ సిక్కు వృద్ధురాలి(షాహీన్‌ బాగ్‌ బామ్మగా భావించి) గురించి తప్పుడు సమాచారంతో కూడిన ట్వీట్‌ చేసిన కంగన కొద్దిసేపటికే దాన్ని డిలీట్‌ చేసింది. 'షాహీన్‌బాగ్‌ బామ్మ రూ.100 ఇస్తే చాలు ఇలాంటి ఆందోళనలకు వచ్చేస్తారు' అని కంగన పేర్కొనడం వల్ల పలువురు సెలబ్రిటీలు, పంజాబీ సింగర్ దిల్జిత్.. కంగనపై విమర్శల వర్షం కురిపించారు.
పరస్పరం మాటం యుద్ధం..
తనపై వచ్చిన విమర్శలపై స్పందించిన కంగన.. దిల్జిత్ పెట్టిన ట్వీట్‌పై మండిపడింది. 'నువ్వు కరణ్‌జోహార్‌ పెంపుడు జంతువు. పౌరచట్టం కోసం ఆందోళన చేసిన ఆ బామ్మే ఇప్పుడు రైతుల కోసం నిరసనలు చేస్తుందని మాత్రమే ట్వీట్‌ చేశా. ఇప్పుడు ఈ డ్రామా ఏంటి?' అని రిప్లై ఇచ్చింది.