బాలీవుడ్ను కించపరిచే విధంగా చిత్రీకరిస్తున్నారంటూ పలు న్యూస్ ఛానళ్లపై బాలీవుడ్ ప్ర‌ముఖులు, నిర్మాణ సంస్థలు దిల్లీ హైకోర్టులో దావా వేశాయి. దీనిపై నటి కంగనా రనౌత్ మ‌రోసారి త‌న‌దైన శైలిలో ఘాటుగా స్పందించింది.
"బాలీవుడ్లో రాయలేని ఓ చట్టం ఉంది. 'నా రహస్యాలు నువ్వు చెప్పకు, నీవి నేను చెప్పను'.. అంటూ ఒకరిపై మరొకరు విధేయతతో ఆధారపడి ఉంటారు. కొంతమంది ప్రముఖుల కుటుంబాల చేతిలోనే ఈ చిత్రసీమ నడుస్తోంది. ఇదంతా నా చిన్నప్పటి నుంచి చూస్తున్నా. ఇంకా ఎప్పటికి మార్పు వస్తుంది? బీటౌన్.. డ్రగ్స్, బంధుప్రీతి, జీహాదీ వంటి చెత్తతో నిండిపోయింది. దీన్ని శుభ్రం చేయకుండా నిలిపివేశారు. ముఖ్యంగా బడా నటులు.. సుశాంత్ సింగ్ లాంటి యువ హీరోలను తొక్కేస్తున్నారు. అలానే మహిళలు, యువతులను వారి గుప్పిట్లో ఉంచుకుంటున్నారు. నా మీద కూడా కేసు పెట్టండి. ఎందుకంటే నేను జీవించి ఉన్నంత వరకు మీ అంద‌రి తప్పులను ఎండగడుతూనే ఉంటా.