బాలీవుడ్ నటి కంగనా రనౌత్ సంప్రదాయ నృత్యంలో శిక్షణ తీసుకుంటోంది. ప్రస్తుతం దివంగత తమిళ ముఖ్యమంత్రి జయలలిత బయోపిక్ 'తలైవి'లో ప్రధాన పాత్ర పోషిస్తోందీ అమ్మడు. ఈ చిత్రం కోసం భరతనాట్యంలోనూ తర్ఫీదు పొందుతోంది. శనివారం డ్యాన్స్ సాధన చేస్తున్న సందర్భంగా తీసుకున్న చిత్రాలను అభిమానులతో పంచుకుంది కంగనా.
"జయలలిత బయోపిక్ కోసం భరతనాట్యం నేర్చుకుంటున్న కంగనా రనౌత్.కచ్చితత్వం కోసం సాధన చేస్తోంది" అని ఫొటోలు ట్విట్టర్ వేదికగా పంచుకుంది టీమ్ కంగనా రనౌత్.
ఈ సినిమా కోసం ఇటీవలే లాస్ ఏంజెల్స్లోని ప్రముఖప్రోస్తటిక్ మేకప్ ఆర్టిస్ట్.. జాసన్ కోలిన్స్ వద్ద కొలతలు ఇచ్చింది. ఆమె మైనంతో నింపబడిన చిత్రాలను అభిమానులతో పంచుకుంది.
'తలైవి' సినిమా కోసం తమిళ పాఠాలు కూడా నేర్చుకుంది కంగనా రనౌత్ . ఈ సినిమాను ప్రముఖ దర్శకుడు ఏఎల్‌ విజయ్‌ తెరకెక్కిస్తున్నాడు. హిందీలో ఈ సినిమాను 'జయ' టైటిల్‌తో విడుదల చేయనుంది చిత్రబృందం. 'బాహుబలి' రచయిత విజయేంద్ర ప్రసాద్‌ కథ అందిస్తున్నాడు. ఈ చిత్రానికి విష్ణు ఇందూరి, శైలేష్ నిర్మాతలు. వచ్చే ఏడాది దీపావళి కానుకగా సినిమా విడుదల కానుంది.
