ఒకప్పుడు తెలుగులో వరుస చిత్రాల్లో కథానాయికగా అలరించింది నటి ప్రియమణి. ప్రస్తుతం టెలివిజన్ షోలతో పాటు, పలు సినిమాల్లో కీలక పాత్రలు పోషిస్తోంది. అంతేకాదు, 'హిజ్ స్టోరీ' అనే హిందీ వెబ్ సిరీస్‌లో నటించింది. ఇందులో ఆమె సాక్షి అనే చెఫ్‌ పాత్రలో కనిపించనుంది. తాజాగా ఈ సినిమాలోని తన పాత్ర గురించి స్పందించింది.
"ఈ చిత్రంలో నేను చెఫ్‌గా నటించా. కానీ, నిజంగా నాకు కోడి గుడ్డు ఉడకబెట్టడం కూడా తెలియదు. సినిమా షూటింగ్‌ సెట్లో ఉన్న యువకులు నాకంటే బాగా వంటచేసేవారు. అలాంటిది నేను వంటగదిలో చేసే పోరాటాన్ని చూసి సెట్లో అందరూ నవ్వుకునేవారు. ఇక తోటి సహనటులైతే నాపై జోకులు వేసుకునేవారు. ఇందులో నా నటనను చూసి ప్రేక్షకులు మెచ్చుకుంటున్నారు."