సుహాస్, చాందిని చౌదరి జంటగా నటించిన చిత్రం 'కలర్ ఫోటో'. సందీప్‌ రాజ్‌ దర్శకుడు. సాయి రాజేశ్ నీలం, బెన్నీ ముప్పానేని నిర్మాతలు. సునీల్ ముఖ్య పాత్రలో నటించారు. ఈ చిత్రం ఓటీటీ వేదిక 'ఆహా' ద్వారా ఈనెల 23న విడుదల కానుంది. ఈ నేపథ్యంలో ఆదివారం రాత్రి హైదరాబాద్‌లో చిత్ర ప్రీరిలీజ్ వేడుకను నిర్వహించారు. శివ నిర్వాణ, మారుతి, కృష్ణ చైతన్య, హను రాఘవపూడి అతిథులుగా హాజరయ్యారు.
సునీల్ మాట్లాడుతూ.. "విలన్ అవ్వాలనే పరిశ్రమకు వచ్చా. కానీ, హాస్యనటుడిగా, సహాయ నటుడిగా చాలా సినిమాలు చేశా. ఈ కథ వినగానే మారు మాట్లాడకుండా ఒప్పుకున్నా" అన్నారు.
'కలర్ ఫోటో' ప్రీరిలీజ్ ఈవెంట్ "నన్ను నమ్మి, తన సొంత కథతో నన్ను దర్శకుడిగా పరిచయం చేసినందుకు సాయిరాజేశ్‌కి ఎప్పుడూ రుణపడి ఉంటా"నని అన్నారు దర్శకుడు సందీప్‌. "నటుడిగా ఉండటం తేలికే కానీ, హీరోగా ఉండటం ఎంత కష్టమో ఇప్పుడర్థమవుతుంది. ఎంతో నిజాయితీగా ఈ చిత్రం తీశామ"న్నారు సుహాస్.
నిర్మాత సాయిరాజేశ్‌ మాట్లాడుతూ.. "ఈ చిత్రాన్ని తెరకెక్కించడానికి మేం పడిన కష్టం తెరపై కనిపిస్తుంది. దర్శకుడు సందీప్‌ చాలా కష్టపడి ఈ స్థాయికి చేరుకున్నాడు. సునీల్ మా చిత్రానికి ప్రధాన ఆకర్షణ. చిత్ర విడుదలకు సహకరించిన నిర్మాతలు అల్లు అరవింద్‌, బన్నీ వాసుకు ప్రత్యేక కృతజ్ఞతలు తెలుపుతున్నా" అన్నారు.
