మైఖేల్ జాక్సన్ మూన్‌ వాక్‌... ప్రభుదేవా స్టైలిష్ డాన్స్ చూస్తే ఎవరైనా 'వావ్' అనాల్సిందే. ఆ తరహాలో డ్యాన్స్ చేసేందుకు హీరోలూ చాలా కష్టపడతారు. బాలీవుడ్ గ్రీక్ గాడ్ హృతిక్ రోషన్ అయితే ప్రత్యేకంగా చెప్పక్కర్లేదు. తనదైన స్టెప్పులతో అభిమానుల మనసు దోచుకుంటాడు. మరి అలాంటి స్టార్ హీరో ఓ యువకుడు చేసిన డ్యాన్స్కు మైమరిచిపోయాడు. ఈ విషయాన్ని ట్విట్టర్ వేదికగా వెల్లడించాడు. అంతేకాకుండా "ఈ కుర్రాడెవరో చెప్పండి" అని అభిమానులను కోరాడు.
ఏమైందంటే..?
హృతిక్ రోషన్ చిత్ర పరిశ్రమలోకి అడుగుపెట్టి నేటికి ఇరవై ఏళ్లు పూర్తయ్యాయి. ఈ సందర్భంగా ఓ అభిమాని టిక్‌టాక్‌ వీడియో తీసి ట్విటర్‌లో తన అభిమాన హీరో హృతిక్‌ను ట్యాగ్‌ చేస్తూ పోస్టు చేశాడు. ఆ వీడియో చూసిన హృతిక్.. "నేను చూసిన గొప్ప ఎయిర్‌ వాకర్‌ డాన్సింగ్ ఇదే.. ఎవరితను..?" అని స్వయంగా తన ఖాతా నుంచి ఆ అభిమాని పెట్టిన పోస్టును షేర్‌ చేశారు.
సినిమాలతో బిజీగా ఉండే హృతిక్ స్వయంగా ఓ అభిమాని వీడియోను షేర్‌ చేస్తూ.. అతని వివరాలు చెప్పమని అడగడం ట్విటర్‌ వేదికగా వైరల్‌ అయింది. హృతిక్ ఆ వీడియోను షేర్‌ చేయడం ఆ డ్యాన్స్ చేసిన కుర్రాడిని నెటిజన్లు తెగ పొగిడేస్తున్నారు. అంతేకాకుండా ఓ అభిమాని వీడియోను హృతిక్ షేర్‌ చేయడాన్ని కూడా మెచ్చుకుంటున్నారు.