సొంత ఫొటో వాడినందుకు నటిపై ఫొటోగ్రాఫర్ కేసు​

హాలీవుడ్‌ నటి, బుల్లితెర స్టార్ కిమ్‌ కర్దాషియాన్‌పై దావా వేశాడు ఓ ఫొటోగ్రాఫర్​. ఓ ప్రైవేట్​ ఆల్బమ్​ కోసం అతడు తీసిన ఫొటోను ఆమె సామాజిక మాధ్యమాల్లో పోస్టు చేయడమే ఇందుకు కారణం.

ప్రముఖ హాలీవుడ్‌ నటి, బుల్లితెర స్టార్‌ కిమ్‌ కర్దాషియాన్‌కు ఫొటోగ్రాఫర్​ సయీద్​ బోల్డెన్​ షాకిచ్చాడు. అనుమతి లేకుండా అతడు తీసిన చిత్రాన్ని సామాజిక మాధ్యమాల్లో పంచుకున్నందుకు దావా వేశాడు. అయితే ఆ మొత్తం ఎంతన్నది తెలపకపోయినా.. ఈ ఫొటో ద్వారా తనకు జరిగిన నష్టాన్ని ఆమె చెల్లించేలా చూడాలని బ్రోక్లెన్​ ఫెడరల్​ కోర్టును కోరాడు.

ఏం జరిగిందంటే..?

2018 జూన్​లో కిమ్​ కర్దాషియాన్, తన భర్త కేన్​ వెస్ట్​తో కలిసి ఓ ప్రైవేట్​ వేడుకకు హాజరైంది. ఇందులో భాగంగా సయీద్​ బోల్డెన్​ అనే ఫొటోగ్రాఫర్​ వారిద్దరి చిత్రాన్ని బంధించాడు. దాన్ని ఓ ఆల్బమ్​కు వాడాలని అనుకున్నాడు. అయితే అదే చిత్రాన్ని అనుమతి లేకుండా అదే ఏడాది అక్టోబర్​లో సామాజిక మాధ్యమాల్లో పోస్టు చేసింది కిమ్. ఆ ఫొటోను సామాజిక మాధ్యమాల నుంచి తొలిగించాలని కోరినా.. పట్టించుకోలేదట. ఈ కారణంగా తాజాగా కిమ్​పై ఫిర్యాదు చేస్తూ.. దావా చెల్లించాలని బ్రోక్లెన్​ ఫెడరల్​ కోర్టును ఆశ్రయించాడీ ఫొటోగ్రాఫర్.

అప్పట్లో 44 కోట్ల దావా..

తన సెక్యూరిటీ గార్డుపై భారీ దావా వేసి వార్తల్లో నిలిచింది కిమ్​. ఈ నటిని కాపాడటంలో విఫలమైనందుకు అతడిపై దాదాపు రూ.44 కోట్ల దావా వేసింది. 2016లో ఓ ఫ్యాషన్‌ కార్యక్రమానికి హాజరయ్యేందుకు కిమ్‌ తన పిల్లలను తీసుకుని పారిస్‌కు వెళ్లింది. అక్కడి ఓ ప్రముఖ ఫైవ్‌స్టార్‌ హోటల్‌లో బస చేసింది. ఆ సమయంలో ఇద్దరు దొంగలు పోలీసుల గెటప్‌లో వచ్చి కిమ్‌ ఉంటున్న గదిలోకి చొరబడ్డారు. ఆమెను బాత్రూమ్‌లో పెట్టి కాళ్లు చేతులు కట్టేసి విలువైన ఆభరణాలను, వస్తువులను దోచుకెళ్లారు.

కిమ్‌ ఆ దోపిడీలో 6.1 మిలియన్‌ డాలర్ల విలువైన వస్తువులు కోల్పోయింది. అయితే ఓ బీమా కంపెనీ ద్వారా కిమ్‌ ఆ మొత్తాన్ని రికవరీ చేసుకోగలిగింది. ఆ సమయంలో కిమ్‌కు సరైన భద్రత కల్పించకపోవడం కారణంగానే దోపిడీ జరిగిందని ఆరోపిస్తూ... కిమ్‌ ఫ్యామిలీ సెక్యూరిటీ గార్డ్‌ డువియర్‌పై 6 మిలియన్‌ డాలర్లు(రూ.46,39,40,000) దావా వేసింది. ఈ ఘటన అప్పట్లో సంచలనంగా మారింది.