'మలర్'​ నుంచి 'రౌడీబేబీ' వరకు అన్నీ రికార్డులే

'భానుమతి ఒక్కటే పీస్‌' అంటూ సాయిపల్లవి ఎంతగా అలరించిందో ప్రత్యేకంగా చెప్పాలా! 'ఫిదా'తో టాలీవుడ్‌కు పరిచయమైన ఈ ముద్దుగుమ్మ.. తొలి చిత్రంతోనే అందరి దృష్టిని ఆకర్షించింది. తన డ్యాన్స్​లతో యూట్యూబ్​లో రికార్డులు బద్దలుగొడుతూ దుసుకుపోతోంది.

చూడగానే మన పక్కింటి అమ్మాయిలా, తనదైన అల్లరితో సందడి చేస్తూ ప్రేక్షకులను కట్టిపడేసింది సాయిపల్లవి. ఆకట్టుకొనే అందం, అందుకు తగ్గ అభినయమున్న ఇలాంటి అమ్మాయి చిత్రపరిశ్రమలో ఒక్కటే పీస్​ అన్నంతగా కుర్రకారుకు మనసులను దోచేసింది. ఈ ముద్దుగుమ్మ 2015లో మలయాళ చిత్రం 'ప్రేమమ్'తో అరంగేట్రం చేసింది. టాలీవుడ్​లోకి 'ఫిధా'తో అడుగుపెట్టి తెలుగు ప్రేక్షకులను ఫిదా చేసేసింది. ఆ తర్వాత 'మిడిల్​ క్లాస్​ అబ్బాయి', 'కణం', 'పడి పడి లేచే మనసు'తో వంటి సినిమాలతో ప్రేక్షకుల ముందుకొచ్చింది. నేడు ఆమె 28వ పుట్టినరోజు ఈ సందర్భంగా.. మిలియన్​ వ్యూస్​ సాధించిన సాయిపల్లవి పాటల విశేషాలు మీకోసం.

నటనలోనే కాదు డ్యాన్స్​లోనూ

దక్షిణాది హీరోయిన్లలో నటనతోనే కాకుండా డ్యాన్స్​తోనూ ఆకట్టుకుంటుంది సాయిపల్లవి. నెట్టింట్లో ఆమె పాటలు, ఫొటోలు ఇప్పటికే వైరల్ అవుతున్నాయి. ఆమె పాటలు యూట్యూబ్​లో రికార్డులు బద్దలు కొడుతున్నాయి.

'మలర్' ఓ సంచలనం

సాయిపల్లవి నటించిన తొలి సినిమా 'ప్రేమమ్'. మలయాళంలో సూపర్​ హిట్​గా నిలిచింది. అందులో 'మలరే....' అంటూ సాగే గీతంతో సాయిపల్లవి పాపులర్​ అయిపోయింది. ఈ చిత్రాన్ని తెలుగులో అదే పేరుతో రీమేక్ చేశారు.

మెల్లగా వచ్చింది...రికార్డు బద్ధలు కొట్టింది

'ఫిదా'తో తెలుగులోకి ఎంట్రీ ఇచ్చిన సాయిపల్లవి మరోసారి ఆకట్టుకుంది. నటనతో పాటు చిత్రంలోని 'వచ్చిందే పిల్ల మెల్లగా వచ్చిందే...' అనే గీతంతో యూట్యూబ్ రికార్డులను సృష్టించింది. దక్షిణాదిలో అత్యధికులు చూసిన పాటగా రికార్డు సాధించింది. ప్రస్తుతం ఇది 250 మిలియన్లకు పైగా వ్యూస్​ సంపాదించుకుంది.

సంచలనం సృష్టించిన 'రౌడీ బేబీ'

ధనుష్​తో కలిసి 'మారి-2'లో నటించింది సాయిపల్లవి. ఇందులోని 'రౌడీ బేబీ' పాటతో కుర్రకారును కుదురుగా కూర్చోనివ్వకుండా చేసింది. మరోసారి తన రికార్డును తానే తిరగరాసింది. కేవలం 16 రోజుల్లోనే 100 మిలియన్ వీక్షణలు దాటిందీ గీతం. ప్రస్తుతం 850 మిలియన్లకు పైగా వ్యూస్​తో దూసుకుపోతోంది.

ప్రస్తుతం లవ్​స్టోరి, విరాటపర్వం అనే రెండు చిత్రాల్లో నటిస్తోంది. లాక్​డౌన్​ నేపథ్యంలో ఈ రెండింటి చిత్రీకరణలు నిలిచిపోయాయి.