లాక్డౌన్తో వచ్చిన ఈ విరామ సమయాన్ని తమ లుక్కులు మార్చుకోవడానికి ఉపయోగిస్తున్నారు కొందరు యువ కథానాయకులు. ఇంతకీ వారెవరో కాదు.. నిఖిల్, మంచు మనోజ్‌. నిఖిల్ ప్రస్తుతం చందూ మొండేటి దర్శకత్వంలో ‘కార్తికేయ 2’ను ప్రారంభించగా.. మనోజ్‌ ‘అహం బ్రహ్మాస్మి’ అనే పాన్‌ ఇండియా చిత్రాన్ని సెట్స్‌పైకి తీసుకెళ్లిన సంగతి తెలిసిందే. ఇప్పటికే లాంఛనంగా ప్రారంభమైన ఈ రెండు చిత్రాలు.. రెగ్యులర్‌ చిత్రీకరణ మొదలు కావల్సిన తరుణంలో కరోనా వల్ల తాత్కాలికంగా ఆగిపోయాయి.
అయితే ఈ అనుకోని విరామాన్ని ఈ ఇద్దరు యువ హీరోలు చక్కగా ఉపయోగించుకుంటున్నారు. నిఖిల్ ఈ సూపర్‌ హిట్‌ సీక్వెల్‌ కోసం సిక్స్‌ ప్యాక్‌ ప్రయత్నిస్తున్నట్లు తెలుస్తోంది. తాజాగా దీనికి సంబంధించి ట్విటర్‌ వేదికగా ఓ ఆసక్తికర ఫొటోను పంచుకున్నారు ఆయన. ఈ చిత్రంలో ఆయన ఆరు పలకల దేహంతో స్టైలిష్‌గా దర్శనమిచ్చారు. ‘‘కసరత్తులు కొనసాగుతున్నాయి. ఇంకో నాలుగు వారాల్లో నా లక్ష్యాన్ని చేరుకుంటా’’ అని ఆ ఫొటోకు ఓ వ్యాఖ్యను జోడించాడు నిఖిల్.