'ఆర్​ఆర్​ఆర్' సెట్​లోకి బాలీవుడ్ స్టార్ హీరో

ప్రముఖ కథానాయకుడు అజయ్ దేవగణ్.. 'ఆర్ఆర్ఆర్' సెట్​లోకి వచ్చేశాడు. ఆ ఫొటోలను చిత్రబృందం విడుదల చేసింది.

హిందీ స్టార్ హీరో అజయ్ దేవగణ్.. ప్రతిష్ఠాత్మక 'ఆర్ఆర్ఆర్' సినిమా సెట్​లోకి అడుగుపెట్టేశాడు. దర్శకధీరుడు రాజమౌళితో అతడున్న ఫొటోలను చిత్రబృందం పంచుకుంది. అయితే ఇందులో ఎలాంటి పాత్రలో అజయ్ కనిపించనున్నాడా? అని అభిమానులు ఎదురుచూస్తున్నారు.

'ఆర్​ఆర్​ఆర్' సెట్​లో హీరో అజయ్ దేవ్​గణ్

ఈ సినిమాలో రామ్​చరణ్-జూనియర్ ఎన్టీఆర్ హీరోలు. చరణ్ అల్లూరి సీతారామరాజుగా, తారక్ కొమరం భీమ్​గా కనిపించునున్నారు. వీరి సరసన ఆలియా భట్, ఒలీవియా మోరిస్ హీరోయిన్లుగా నటిస్తున్నారు. ఇప్పటికే 70 శాతానికి పైగా చిత్రీకరణ పూర్తయింది. ప్రస్తుతం జరుగుతున్న షెడ్యూల్​లో కీలక సన్నివేశాలను తీస్తున్నారు.

ఇద్దరు సూపర్​ హీరోల కలిస్తే ఎలా ఉంటుంది అనే కల్పిత కథతో ఈ సినిమాను తీస్తున్నారు. కీరవాణి సంగీతమందిస్తున్నాడు. డీవీవీ దానయ్య దాదాపు రూ.350 కోట్లతో నిర్మిస్తున్నారు.