Shyam Singh Roy team Green India Challenge: గ్రీన్ ఇండియా ఛాలెంజ్‌లో భాగంగా.... 'శ్యామ్ సింగ రాయ్' బృందం మొక్కలు నాటింది. జూబ్లీహిల్స్ ప్రశాసన్‌నగర్‌లోని జీహెచ్ఎంసీ పార్కులో కథానాయకుడు నానితో పాటు హీరోయిన్లు సాయి పల్లవి, కృతిశెట్టి, చిత్ర నిర్మాత బోయినపల్లి వెంకట్ మొక్కలు నాటారు. రాజ్యసభ సభ్యులు జోగినిపల్లి సంతోష్ ప్రారంభించిన ఈ కార్యక్రమం పర్యావరణ పరిరక్షణకు ఎంతో తోడ్పడుతుందని నాని పేర్కొన్నారు. గ్లోబల్‌ వార్మింగ్‌ నుంచి భవిష్యత్ తరాలను కాపాడుకునేందుకు ప్రతి ఒక్కరూ మొక్కలు నాటాలని ఆయన కోరారు.
ప్రతి ఒక్కరూ మొక్కలు నాటాలి..
గ్రీన్ ఇండియా ఛాలెంజ్ మనందరి బాధ్యతని... ప్రతిఒక్కరూ మొక్కలు నాటాలని హీరో నాని అన్నారు. గ్రీన్ ఇండియా ఛాలెంజ్ని ఎంపీ సంతోష్ కుమార్ ఉద్యమంలా ముందుకు తీసుకెళ్తున్నారని పేర్కొన్నారు. సినిమా ఇండస్ట్రీలోని నటీనటులు, రాజకీయ నాయకులు అందరూ ఈ సవాల్ను స్వీకరిస్తున్నారని చెప్పారు. ఈ కార్యక్రమంతో పర్యావరణంపై ప్రజల్లో ఎంతో అవగాహన కలుగుతోందని నాని పేర్కొన్నారు. ఇందులో భాగస్వామ్యం అయి... మొక్కలు నాటడం ఎంతో సంతోషంగా ఉందని అన్నారు.