భారత తొలి రాక్​స్టార్​ 'ఫ్రెడ్డీ మెర్క్యూరీ'పై ఓ లుక్​!

సెప్టెంబర్ 5న సర్వేపల్లి రాధాకృష్ణ పుట్టినరోజు అని అందరికీ తెలుసు. ఈ సందర్భంగా ఉపాధ్యాయ దినోత్సవం జరుపుకుంటున్నాం. ఈ రోజుకు ఇంకో ప్రత్యేకత ఉంది. ప్రపంచవ్యాప్తంగా గుర్తింపు పొందిన భారత తొలి రాక్​స్టార్ ఫ్రెడ్డీ మెర్క్యూరీ పుట్టింది నేడే. ఈయన జీవితం ఆధారంగా వచ్చిన బొహిమియన్ రాప్సోడీ చిత్రానికి ఈ ఏడాది 4 ఆస్కార్లు వచ్చాయి.

ఫ్రెడ్డీ మెర్క్యూరీ.. ప్రపంచవ్యాప్తంగా ప్రాచుర్యం పొందిన సంగీత దిగ్గజం. రాక్ మ్యూజిక్ చరిత్రలో గొప్ప సింగర్స్​లో ఒకరిగా గుర్తింపు తెచ్చుకున్నాడు. 70, 80వ దశకాల్లో సంగీత ప్రపంచాన్ని ఉర్రూతలూగించిన ఫ్రెడ్డీ భారత సంతతికి చెందిన వ్యక్తి అని ఎంతమందికి తెలుసు? ఆయన బాల్యం ముంబయిలోనే గడిచింది. నేడు ఫ్రెడ్డీ పుట్టినరోజు సందర్భంగా ఆయనపై ఓ లుక్కేద్దాం!

భారత తొలి రాక్​స్టార్​..

ఫ్రెడ్డీ మెర్క్యూరీ అసలు పేరు ఫరూఖ్ బల్సారా. భారత్​కు చెందిన పార్శీ దంపతులు బోమి బల్సారా, జెర్ బల్సారాకు బ్రిటీష్ అధీనంలోని జాంజిబార్​లో జన్మించాడు. ముంబయిలోని సెయింట్ పీటర్,​సెయింట్ మేరీ పాఠశాలల్లో చదువుకున్నాడు. ఇక్కడే అతడి పేరును ఫ్రెడ్డీగా మార్చుకున్నాడు. స్కూల్లో ఉండగానే తన స్నేహితులతో కలిసి 'ద హెక్టిక్స్'​ అనే బ్యాండ్ ఏర్పాడు చేశాడు.

ఆల్బమ్​లతో ప్రపంచవ్యాప్తంగా క్రేజ్..

అనంతరం 1970 లండన్​లో నలుగురితో కలిసి 'క్వీన్' అనే రాక్​ బ్యాండ్ ఏర్పాటు చేశాడు. ఈ బ్యాండ్ ద్వారా మర్చిపోలేని ఎన్నో పాటలకు ప్రాణం పోశాడు. 'కిల్లర్ క్వీన్, బొహిమియన్ రాప్సోడీ, సమ్​బడీ టు లవ్, వీ ఆర్​ ద ఛాంపియన్స్​, డోన్ట్ స్టాప్ మీ నౌ, క్రేజీ లిటిల్ థింగ్ కాల్డ్ లవ్' లాంటి ఆల్బమ్స్​తో ప్రపంచవ్యాప్తంగా క్రేజ్ తెచ్చుకున్నాడు.

అత్యధిక మంది పాల్గొన్న లైవ్​ షో..

ప్రపంచదేశాల్లో ఎన్నో లైవ్ ప్రదర్శనలతో ప్రేక్షకులను అలరించాడు ఫ్రెడ్డీ. 1985లో ఇచ్చిన లైవ్​ ఎయిడ్ ఆయన ప్రదర్శనల్లో ఎప్పటికీ గుర్తుండి పోతుంది. లండన్, అమెరికా రెండు చోట్ల నిర్వహించిన ఈ ప్రదర్శనకు అత్యధిక మంది హాజరయ్యారు. లండన్​ లైవ్​ షోకు 72 వేలు మంది రాగా.. యూఎస్​లో లక్షమంది పాల్గొన్నారు. ఇప్పటికీ ఇదే రికార్డు.

బయోపిక్​కు ఆస్కార్ల పంట..

ఫ్రెడ్డీ మెర్క్యూరీ జీవితం ఆధారంగా 2018లో బొహిమియన్ రాప్సోడీ అనే చిత్రం వచ్చింది. ఈ సినిమాలో ఫ్రెడ్డీ పాత్రను పోషించిన రమీ మాలెక్ ఉత్తమ నటుడిగా ఆస్కార్ అవార్డు అందుకున్నాడు. మొత్తం ఈ చిత్రానికి 4 అకాడమీ పురస్కారాలు వచ్చాయి. ఫ్రెడ్డీ రూపొందించిన ఆల్బమ్ పేరు మీద ఈ సినిమా తీశారు. ఈ ఆల్బమ్ యూకేలో ఎక్కువ మంది కొనుగోలు చేసిన వాటిలో మూడోది.

హెచ్​ఐవీతో మరణం...

1986 హెచ్​ఐవీ బారిన పడిన ఫ్రెడ్డీ మెర్క్యూరీ మొదట ఈ విషయాన్ని ఎవరికీ చెప్పలేదు. అనంతరం 1987లో ఆయన స్నేహితురాలి ద్వారా ఈ విషయం ప్రపంచానికి తెలిసింది. 1991 నవంబరు 24న నిమోనియాతో 45 ఏళ్ల వయసులోనే మరణించాడు.

ఇది చదవండి: భాగ్యనగరంలో బొద్దుగా కనిపించిన బొమ్మాళీ