సూపర్స్టార్ రజనీకాంత్ కథానాయకుడిగా శంకర్‌ దర్శకత్వంలో తెరకెక్కిన బ్లాక్‌బస్టర్‌ మూవీ 'రోబో'. చిట్టి రోబోగా రజనీ నటన ప్రేక్షకులను కట్టిపడేసింది. 2010లో వచ్చిన ఈ చిత్రం ఎంతటి ఘన విజయాన్ని సొంతం చేసుకుందో అందరికీ తెలిసిందే. 90వ దశకంలోనే ఈ చిత్రం రావాల్సి ఉంది. తొలుత పలువురు హీరోలను అనుకున్నా చివరికి ఈ చిత్రం రజనీతో కుదిరింది.
లోకనాయకుడితో..
అయితే మొదట ఇందులో కథానాయకుడిగా కమల్‌హాసన్‌ను అనుకున్నారు. కథానాయికగా ప్రీతి జింటాను కూడా తీసుకున్నారు. 1998లోనే ఇందుకు సంబంధించిన ఫొటో షూట్ చేశారు. అయితే, ఆ తర్వాత ఈ ప్రాజెక్టు రద్దయింది. శంకర్‌కు ఉన్న విజన్‌ ప్రకారం అప్పటికి ఆ స్థాయి టెక్నాలజీ అందుబాటులో లేదు. పైగా కమల్‌హాసన్‌ కూడా వేరే చిత్రాల్లో బిజీగా ఉండటం వల్ల సినిమా ముందుకు సాగలేదు.