మెగాస్టార్​ మెచ్చిన ఫైర్​మెన్​- రూ.లక్ష సాయం

నాలాలో పడిపోయిన చిన్నారిని కాపాడినందుకు ఓ ఫైర్​మెన్​, సిబ్బందిని ప్రశంసించారు మెగాస్టార్​ చిరంజీవి. ఆయన ట్రస్టు నుంచి లక్ష ఆర్థిక సహాయం అందజేశారు.

హైదరాబాద్​లో కురుస్తున్న వర్షం కారణంగా గౌలిగూడలో నాలుగేళ్ల దివ్య... ప్రమాదవశాత్తూ నాలాలో పడిపోయింది . ఆ సమయంలో చాకచక్యంతో వ్యవహరించి ఆ పాప ప్రాణాలు కాపాడారు అగ్నిమాపక సిబ్బంది.

చిన్నారి దివ్యతో అగ్నిమాపక సిబ్బంది

అప్పుడు తీసిన ఓ వీడియో ప్రసార మాధ్యమాల్లో చూశారు మెగాస్టార్​ చిరు. చిన్నారి దివ్యను మృత్యువు నుంచి కాపాడిన ఫైర్​మెన్ క్రాంతికుమార్‌ను మెచ్చుకున్నారు. తర్వాత చిరంజీవి ఛారిటబుల్ ట్రస్ట్ తరఫున రూ.లక్ష బహుమతిగా అందజేశారు. ఈ మేరకు నిర్మాత అల్లు అరవింద్ సంబంధించిన నగదు అందజేసి...ఫైర్​మెన్​కు సత్కారం చేశారు. క్రాంతి కుమార్‌కు సహకరించిన ఫైర్ సిబ్బందిని, గౌలిగూడ స్టేషన్ ఫైర్ ఆఫీసర్ జయరాజ్ కుమార్‌ను చిరంజీవి ప్రత్యేకంగా అభినందించారు. ప్రాణాలతో బయటపడిన దివ్యకు అండగా ఉంటామని అల్లు అరవింద్ తెలిపారు.