వైవిధ్యభరిత కథలకు కేరాఫ్ అడ్రస్గా మారిన హీరో అడివి శేష్. 'ఎవరు' సినిమాతో థియేటర్లలో గురువారం నుంచి సందడి చేయనున్నాడు. ప్రచారంలో భాగంగా సినిమాకు సంబంధించిన ఆసక్తికర విషయాన్ని పంచుకున్నాడు. విడుదలకు ముందే సినిమాను కొంత మంది యువతకు చూపించి అభిప్రాయాలు తెలుసుకున్నామని చెప్పాడు.
"ఈ సినిమా 70 శాతం షూటింగ్ కాగానే కొంత మంది యువతీయువకులకు చూపించాం. వారి అభిప్రాయాలకు తగ్గట్లుగా మళ్లీ మార్పులు చేశాం. ఆ తర్వాత మరికొంతమందికి చూపించాం. అనంతరం కొన్ని రీషూట్లు చేశాం. అలా గత అక్టోబరు నుంచి ఇప్పటి వరకు దాదాపు 25 బ్యాచ్‌లుగా వెయ్యి మందికి పైగా సినిమాను చూపించి వాళ్ల అభిప్రాయాలను దృష్టిలో పెట్టుకొని మరీ జాగ్రత్తగా ‘ఎవరు’ను తెరకెక్కించాం. ఇలా తెలుసుకోవడం అంత సులభమైన విషయం కాదు. హీరో, డైరెక్టర్ల ముందు సినిమా చూపించి ఎలా ఉంది అంటే? బాగుంది అనేసి వెళ్లిపోతారు. కానీ వాళ్ల మనసులోని నిజాన్ని తెలుసుకోవాలంటే హీరో కానీ, దర్శకుడు కానీ ఎవరు వాళ్ల దగ్గరలో ఉండకూడదు. అందుకే ‘ఎవరు’ చిత్రబృందంలోని ఒక తెలియని వ్యక్తిని థియేటర్లో ఉండమని చెప్పి, ప్రేక్షకుల అభిప్రాయాలు తెలుసుకున్నాం. అలా అనేక సార్లు కథలో మార్పులు చేర్పులు చేసుకున్నాం" - అడివి శేష్, నటుడు