Abhishekam Serial: తెలుగు టెలివిజన్‌ చరిత్రలోనే ఓ కొత్త అధ్యాయం సృష్టించిన ధారావాహిక 'అభిషేకం'. ఈటీవీలో 14 సంవత్సరాల క్రితం.. 2008 డిసెంబరు 22న ప్రారంభమైన ఈ డైలీ సిరీయల్‌, నిరాటంకంగా ప్రసారమవుతూ సరిగ్గా 4000 ఎపిసోడ్లు పూర్తి చేసుకుని ఈ రోజే ముగుస్తోంది.
ఇప్పటి వరకు మరే తెలుగు సీరియల్ సాధించలేని ఈ ఘనతను 'అభిషేకం' సొంతం చేసుకుంది. దర్శకరత్న దాసరి నారాయణరావు తానే స్వయంగా కథ అందించి, తన పర్యవేక్షణలో ప్రారంభించిన ఈ సీరియల్‌కు ఆయన సతీమణి దాసరి పద్మ నిర్మాతగా వ్యవహరించారు. ‘సౌభాగ్య మీడియా’ పతాకంపై నిర్మించిన ఈ సీరియల్ అచ్చ తెలుగు కథతో అశేష తెలుగు ప్రేక్షకలోకాన్ని ఆకర్షించింది. ఎన్ని ఛానళ్లలో ఎన్ని సీరియల్స్‌ మారుతున్నా ఈటీవీలో ప్రతి మధ్యాహ్నం 2 గంటలకు మాత్రం 'అభిషేకం' అప్రతిహతంగా సాగిపోతూనే వచ్చింది. ఈ ప్రయాణంలో ఎన్నో అవార్డులు - రివార్డులు సొంతం చేసుకుంది. శ్రీహరి, జయసుధ, మురళీమోహన్‌, వైజాగ్‌ ప్రసాద్‌ తదితర ప్రముఖులెందరో ఈ ధారావాహికలో నటించారు. నిర్మాణ బాధ్యతల్ని తాండవ కృష్ణ నిర్వహించారు. ఇంతటి ప్రజాదరణ పొందిన అభిషేకం సీరియల్ చివరి ఎపిసోడ్‌ ఈ రోజు(మంగళవారం) మధ్యాహ్నం ఈటీవీలో ప్రసారం కానుంది.
ఫిబ్రవరి 2, బుధవారం నుంచి ప్రతిరోజూ మధ్నాహ్నం 2 గంటలకు
ఎన్నో ఆణిముత్యాల్లాంటి సీరియల్స్‌ను తెలుగు ప్రేక్షకులకు అందించిన ఈటీవీ, సరికొత్తగా సమర్పిస్తోన్న ధారావాహిక- గీతాగోవిందం, మల్లెమాల ఎంటర్‌టైన్‌మెంట్స్‌ నిర్మిస్తున్న ఈ సీరియల్, రెండు భిన్న మనస్తత్వాలున్న వ్యక్తులు అగ్నిసాక్షిగా ఒకటైతే.. ఆ బంధమే వారికి అగ్ని పరీక్షగా మారితే..అనే అంశాన్ని అడుగడుగునా ఉత్సుకత కలిగించే రీతిలో తెరకెక్కించనుంది.