'ద రాక్' కుటుంబం మొత్తానికి కరోనా

తమ కుటుంబానికి కరోనా సోకిందని హాలీవుడ్ ప్రముఖ నటుడు డ్వేన్ జాన్సన్ వెల్లడించారు. మూడు వారాల క్రితం పాజిటివ్​ తేలిందని, ప్రస్తుతం దాని నుంచి కోలుకున్నామని తెలిపారు.

'ద రాక్'గా మనందరికి తెలిసిన డబ్ల్యూడబ్ల్యూఈ రెజ్లర్, హాలీవుడ్ ప్రముఖ నటుడు డ్వేన్ జాన్సన్.. కొవిడ్ బారిన పడ్డారు. అతడితో పాటే కుటుంబంలోని భార్య, ఇద్దరు కుమార్తెలకు వైరస్​ సోకింది. ప్రస్తుతం అందరం కోలుకున్నామని, ఆరోగ్యంగానే ఉన్నట్లు చెబుతూ ఇన్​స్టాలో వీడియోను పోస్ట్ చేశారు.

90ల్లో డబ్ల్యూడబ్ల్యూఈలోకి ఎంట్రీ ఇచ్చిన జాన్సన్.. 1998లో డబ్ల్యూడబ్ల్యూఎఫ్ ఛాంపియన్​షిప్ గెల్చుకున్నారు. 1990-2000 మధ్య కాలంలో పలు రెజ్లింగ్ రికార్డులు సాధించారు. 'ద రాక్'గా గుర్తింపు తెచ్చుకున్న ఇతడు.. 2004 తర్వాత నటనపై దృష్టి సారించారు. 2011-13 మధ్యలో పార్ట్​టైమ్ రెజ్లర్​గానూ కొనసాగారు. గతేడాది పూర్తిస్థాయి కెరీర్​కు​ రిటైర్మెంట్​ పలికి పలు సినిమాల్లో కీలకపాత్రలు చేస్తూ బిజీగా ఉన్నారు.

హాలీవుడ్ నటుడు డ్వేన్ జాన్సన్ కుటుంబం

జాన్సన్ నటించిన వాటిలో 'ద స్కార్పియన్ కింగ్'(2002), 'గేమ్ ప్లాన్'(2007), 'హెర్క్యూలస్'(2014), 'సాన్ ఆండ్రస్'(2015), 'రాంపేజ్'(2018) సినిమాలతో పాటు 'ఫాస్ట్ అండ్ ఫ్యూరియస్' సిరీస్​లో ఐదు, ఆరు, ఏడు భాగాలు ఉన్నాయి. జుమాంజీ ఫ్రాంఛైజీలోనూ 'జుమాంజీ: వెల్​కమ్ టూ జంగిల్'(2017), 'జుమాంజీ: ద నెక్స్ట్​ లెవల్'(2019)ల్లో ప్రధాన పాత్రలు పోషించారు 'ద రాక్'.