'ఆదిత్యను నేను చాలాసార్లు ఓడించాను'

హీరో ఆదిత్య కపూర్​తో తన స్నేహం గురించి, ఇద్దరి మనస్తత్వాల గురించి చెప్పుకొచ్చింది నటి దిశా పటానీ. బాస్కెట్​బాల్ ఆటలో తనను చాలాసార్లు ఓడించినట్లు తెలిపింది.

బాలీవుడ్‌లో గతేడాది వచ్చిన చిత్రం 'మలంగ్‌'. ఇందులో జంటగా నటించిన ఆదిత్య రాయ్ కపూర్, దిశాపటానీలు తమ కెమిస్ట్రీతో మెప్పించారు. ఇప్పుడు 'ఏక్‌ విలన్‌ 2'లో మళ్లీ జోడీగా నటిస్తున్నారు. అయితే తాజాగా జరిగిన ఓ ఇంటర్వ్యూలో మాట్లాడిన దిశా.. ఆదిత్యతో తనకు ఎలా పరిచయమైంది, తామిద్దరి మధ్య ఉన్న సారుప్యతలు ఏంటో చెప్పుకొచ్చింది.

"నేను 'మలంగ్‌'లో నటించడానికి ముందే ఆదిత్య తెలుసు. అదీ ఎలాగంటే.. ఇద్దరం ఒకే జిమ్‌కు వెళ్లేవాళ్లం. అక్కడే అతడితో పరిచయం ఏర్పడింది. ఆ తర్వాత మంచి స్నేహితులమయ్యాం. ఓ సారి ఇద్దరం కలిసి బాస్కెట్‌ బాల్ ఆడాం. అందులో అతడ్ని (ఆదిత్య) చాలాసార్లు ఓడించాను. కొన్నాళ్ల తర్వాత ఇద్దరం 'మలంగ్‌'లో కలిసి నటించాల్సి వచ్చినప్పుడు మా మధ్య ఎలాంటి ఇబ్బంది లేకుండా పోయింది" -దిశాపటానీ, హీరోయిన్

లాక్‌డౌన్‌ వేళ 'మలంగ్‌' సహనటులైన అనిల్‌ కపూర్, ఆదిత్య కపూర్, కునాల్‌ కేమ్‌తో దిశా వీడియో చాట్ చేసింది. ఇందులో ఆమె మాట్లాడుతూ "ఆదిత్య కపూర్‌-నాకు చాలా దగ్గర సంబంధం ఉంది. ఎందుకంటే మేమిద్దరం సమాజానికి వ్యతిరేకులం. ఇద్దరం ఎవరితోనూ అంత తొందరగా కలిసిపోం. మేమిద్దరం అంతర్ముఖులం. అందుకే అంటారు కాబోలు! ఏ గూటి పక్షి ఆ గూటికే చేరుతుందని. అలా మా ఇద్దరి మనస్తత్వాలు ఒకేలా ఉంటాయని అనుకుంటున్నా" అంటూ చెప్పుకొచ్చింది.

ప్రస్తుతం దిశా, ఆదిత్య నటిస్తున్న 'ఏక్ విలన్2'.. ఈ ఏడాదిలోనే సెట్స్‌పైకి వెళ్లనుంది. మోహిత్‌ సూరి దర్శకత్వం వహిస్తున్నాడు. వచ్చే ఏడాది జనవరి 8న ప్రేక్షకుల ముందుకు రానుంది.