Director ramesh varma khiladi movie: "మంచి కథతో తీసిన విందు భోజనం లాంటి సినిమా 'ఖిలాడి'. ప్రేక్షకుల్ని థ్రిల్‌ చేస్తుంది. ఎక్కడా నిరాశపరచదు" అని అన్నారు రమేష్ వర్మ. 'రాక్షసుడు' వంటి హిట్ తర్వాత ఆయన తెరకెక్కించిన చిత్రమే 'ఖిలాడి'. రవితేజ కథానాయకుడిగా నటించారు. మీనాక్షి చౌదరి, డింపుల్‌ హయాతి కథానాయికలు. కోనేరు సత్యనారాయణ నిర్మించారు. ఈ సినిమా శుక్రవారం ప్రేక్షకుల ముందుకొస్తోంది. ఈ సందర్భంగా గురువారం హైదరాబాద్‌లో విలేకర్లతో చిత్ర విశేషాలు పంచుకున్నారు రమేష్ వర్మ.
అన్ని రకాల వాణిజ్యాంశాలు పుష్కలంగా ఉన్న చిత్రమిది. ఏడుపు, భయం, యాక్షన్‌, కామెడీ, ఆశ్చర్యం.. ఇలా అన్ని రకాల భావోద్వేగాల సమాహారంగా ఉంటుంది. ఆద్యంతం థ్రిల్‌ చేస్తుంది. ఇందులో రవితేజ ద్విపాత్రాభినయం చేశారు. ఆ రెండు పాత్రలు వేటికవే భిన్నంగా కొత్తగా ఉండనున్నాయి. సినిమాలో ఆయన ఎనర్జీ లెవల్‌ మరోస్థాయిలో కనిపిస్తుంది. ఈ సినిమా చిత్రీకరణ ఇటలీ, ఒమన్‌, దుబాయ్‌ వంటి దేశాల్లో జరిగింది. కథరీత్యానే అక్కడ చేయాల్సి వచ్చింది. సినిమాలో యాక్షన్‌కు పెద్ద పీట వేశాం. ఇవన్నీ హాలీవుడ్‌ స్టైల్‌లో ఉంటాయి. దాదాపు రూ.45కోట్ల బడ్జెట్‌తో ఈ చిత్రం నిర్మించారు.