ఏ డైరెక్టర్‌ అయినా హీరోనో ప్రొడ్యూసర్‌నో వెతుక్కుంటారు. కానీ.. ఈ డైరెక్టర్‌ మాత్రం హీరోలోనే ప్రొడ్యూసర్‌ను వెతుక్కుంటారు. మనం మాట్లాడుకుంటున్నది 'అ!' అనే అద్భుతమైన సినిమా తీసిన ప్రశాంత్‌వర్మ(Director Prasanth Varma) గురించి. 'ఈటీవీ'లో తరుణ్‌భాస్కర్‌ వ్యాఖ్యాతగా ప్రసారమయ్యే 'మీకు మాత్రమే చెప్తా' కార్యక్రమంలో ప్రశాంత్‌వర్మ ముఖ్య అతిథిగా పాల్గొని సందడి చేశారు. ఈ సందర్భంగా తరుణ్‌భాస్కర్‌ అడిగిన పలు ప్రశ్నలకు ప్రశాంత్ ఆసక్తికరమైన విషయాలు పంచుకున్నారు.
తరుణ్‌ భాస్కర్: చదువులో రాష్ట్రస్థాయి, క్రీడల్లో జిల్లా స్థాయి.. ఇక దర్శకత్వంలో చెప్పాల్సిన అవసరం లేదు. ఈ మూడింటినీ ఎలా మేనేజ్‌ చేయగలుగుతున్నారు..?
ప్రశాంత్‌వర్మ: మా అమ్మ మ్యాథ్స్‌ టీచర్‌. చిన్నప్పటి నుంచి నేను టాపర్‌గా ఉండాలనే అమ్మ కోరుకునేది. క్లాస్‌లో ఎవరైనా టీచర్‌ రాకపోతే క్లాస్‌లో తర్వాతి పాఠం నేనే చెప్పేవాడిని. ఎందుకంటే వేసవి సెలవుల్లో రాబోయే తరగతి పాఠాలు మొత్తం మా అమ్మ మాకు చెప్పేవారు. ఇక మా నాన్న గురించి చెప్పాలంటే.. చిన్నప్పుడు ఒక కండిషన్‌ పెట్టేవారు. కంటికి బాల్‌ కనిపించకుండా చీకటి పడేవరకూ క్రికెట్‌ ఆడాలనేవారు. ఆయనకు క్రీడలు అంటే చాలా ఇష్టం. 11మందిలో ఎవరో ఒకరు తప్పు చేసినా ఓడిపోవడం నాకు నచ్చేది కాదు. అందుకే 'ఇలా అయితే కుదరదు సింగిల్‌గా ఆడాల్సిందే' అని చెప్పి బ్యాడ్మింటన్‌కు మారాను.
తరుణ్‌ భాస్కర్: సడెన్‌గా సినిమాల్లోకి ఎలా వచ్చారు..?
ప్రశాంత్‌వర్మ: చిన్నప్పటి నుంచే సినిమా అంటే పిచ్చి. అయితే.. ఇండస్ట్రీలోకి వస్తానని మాత్రం ఎప్పుడూ అనుకోలేదు. ఇంజినీరింగ్‌లో ఉన్నప్పుడు సరదాగా ఫిల్మ్‌ మేకింగ్‌ నేర్చుకున్నా. సెకండ్‌ ఇయర్‌లోనే ఇంజినీరింగ్‌ పుస్తకాలు మొత్తం చదివేశా. ఆ తర్వాత స్క్రిప్టు రాయడం మొదలు పెట్టా.
తరుణ్‌ భాస్కర్: ఎవరైనా నానితో హీరోగా చేద్దామని అనుకుంటారు..? మీతో నిర్మాతగా చేయడం ఏంటి..?
ప్రశాంత్‌వర్మ: నేను తీసిన ఒక షార్ట్‌ఫిల్మ్‌ ఆయన చూశారు. బాగా నచ్చడం వల్ల నాకు ఫోన్‌ చేసి.. 'బాగా వచ్చింది.. ఇలాంటి క్రేజీ కథలు ఉంటే చెప్పు' అన్నారు. ఆ తర్వాత కొన్నాళ్లకు 'అ!' సినిమాలో వాయిస్‌ ఓవర్‌ కోసం ఆయనకు మెసెజ్‌ పెట్టాను. 'కథ బాగుంది.. మరి నిర్మాత ఉన్నారా..?' అని నన్ను అడిగారు. 'ఎవరూ లేరు. నేనే చేద్దామనుకుంటున్నా' అని చెప్పాను. నిర్మాత కోసం ఆయన కూడా ప్రయత్నించారు. ఆ తర్వాత తానే ప్రొడ్యూస్‌ చేస్తానని నాకు ఫోన్‌ చేశారు. అలా ఆయన నిర్మాతగా మారారు.
తరుణ్‌ భాస్కర్: కథ రాసుకున్నప్పటి నుంచి సినిమా విడుదలయ్యే వరకూ జర్నీ ఎలా సాగింది?
ప్రశాంత్‌వర్మ: నాకోసం కాకుండా వేరేవాళ్ల కోసం రాసిన కథలన్నీ కొంచెం క్లిష్టంగా ఉండేవి. ఎప్పుడైతే నాకోసం రాసుకోవడం మొదలుపెట్టానో అప్పుడు అన్ని సులభంగా మారాయి. చాలామందికి నేను చెప్పే కథ అర్థం కాకపోయినా.. వాళ్లు ఒప్పుకునేవారు. అలాగే నానిగారు కూడా నాతో సినిమా చేశారు. ఆ సినిమాకు టీజర్‌, ట్రైలర్‌ కూడా నేనే కట్‌ చేశాను. నానిగారు ఆశ్చర్యపోయి.. 'ఏంటీ.. ఇవన్నీ నువ్వే చేశావా..?' అన్నారు. కథ బయటికి వెళ్లకూడదన్న ఉద్దేశంతో సెట్లో ఉన్నవాళ్లకు కూడా ఫేక్‌ స్టోరీలు చెప్పేవాళ్లం. నాతో పాటు హీరో, హీరోయిన్‌కు మాత్రమే కథ తెలిసేది. క్లైమాక్స్‌ షూట్‌ చేసే సమయంలో కథ తెలియడం వల్ల సెట్లో అందరూ 'మాకు వేరే కథ చెప్పారు' అని కోపంగా చూసేవారు(నవ్వుతూ)..
తరుణ్‌ భాస్కర్: కొత్త డైరెక్టర్‌ అయ్యుండి.. 22 టేక్‌లు ఎందుకు చేశారు..?
ప్రశాంత్‌వర్మ: ఆ సినిమాలో రెజీనా డ్రగ్‌ అడిక్ట్‌. ఆ పాత్రలో లీనమవ్వాలంటే సమయం పడుతుంది. ఆమె కూడా బాగా కష్టపడింది. అయితే.. ఆమె అలాంటి పాత్రలు చేయకపోవడం వల్ల మరింత శ్రమించాల్సి వచ్చింది.