మానవత్వం చాటిన దర్శక దంపతులు

కన్నబిడ్డను పెంచే స్థోమత లేదో లేక ఆడపిల్ల పుట్టిందన్న కోపమో తెలీదు కాని ముక్కు పచ్చలారని ఓ పసికందును చెత్తకుప్పలో వదిలేసి వెళ్లిపోయిందో కర్కశ తల్లి. ఆ పసిబిడ్డ రోదనకు చలించిన బాలీవుడ్​ దర్శకుడు వినోద్​ కాప్రి దంపతులు... ఆ పసికందును దత్తత తీసుకొనేందుకు ముందుకొచ్చారు.

రాజస్థాన్‌లోని ఓ ప్రాంతంలో పసికందును చెత్తకుప్పలో వదిలేసి వెళ్లిన ఘటన చోటు చేసుకుంది. దుర్వాసన మధ్య ఏడుస్తోన్న ఆ చిన్నారి వీడియో తీసి నెట్టింట పోస్టు చేశారు స్థానికులు. అది కాస్తా సోషల్​ మీడియాలో వైరల్​ అయింది. వెంటనే స్పందించిన సీనియర్​ పాత్రికేయుడు, బాలీవుడ్​ దర్శకుడైన వినోద్​ కాప్రి దంపతులు ఆ పసికందును స్వీకరించేందుకు సిద్ధమయ్యారు.

పాపకు ప్రస్తుతం ఆసుపత్రిలో చికిత్స అందిస్తున్నారు. ఆ చిన్నారికి పీహూ అని పేరుపెట్టారు. ‘'పీహూ'’ ఆయన తెరకెక్కించిన సినిమా పేరు.

" ఈ చిన్నారి దేవతతో నేను నా భార్య సాక్షి జోషి ప్రేమలో పడ్డాం. దత్తత తీసుకునే ప్రక్రియ మొదలైంది. పాప కోసం భవిష్యత్తులో ఎంతో చేయాల్సి ఉంది. పాప ఇంకా మా ఇంట్లో అడుగుపెట్టలేదు. అన్నీ అనుకున్నట్లు జరిగాక మిగిలిన విషయాలు మాట్లాడతాను".
--వినోద్​ కాప్రి, బాలీవుడ్​ దర్శకుడు

హైదరాబాద్​లో పుట్టిన వినోద్​ కాప్రి.. 2014లో ఆయన తెరకెక్కించిన 'కాంట్​ టేక్​ దిస్​ షిట్​ ఎనీమోర్​' అనే లఘు చిత్రానికి జాతీయ అవార్డు గెలుచుకున్నారు. పదేళ్లకు పైగా జర్నలిస్టుగా పలు సంస్థల్లో అనుభవమున్న ఆయన... గతేడాది పీహూ చిత్రంతో ప్రేక్షకులను మెప్పించారు.