'ఎఫ్ 2'.. వెంకటేష్, వరుణ్ తేజ్ కలిసి నవ్వులు పూయించిన చిత్రం. వాళ్లు ఫ్రస్టేషన్‌లో ఉంటూనే ప్రేక్షకులకు ఎంతో ఫన్‌ అందించారు. దర్శకుడు అనిల్‌ రావిపూడి తెరకెక్కించిన ఈ సినిమా గతేడాది సంక్రాంతికి విడుదలై మంచి విజయాన్ని అందుకుంది. ఇదే ఉత్సాహాన్ని కొనసాగించేందుకు సీక్వెల్ తెరకెక్కబోతుంది. 'ఎఫ్ 3'గా వచ్చి అంతకుమించి కామెడీ అందించనుంది. అయితే ఈ సీక్వెల్లో ముగ్గురు కథానాయకులు ఉండబోతున్నారనే విషయం తెలిసిందే. వెంకీ, వరుణ్‌లతోపాటు రవితేజ నటిస్తారని ప్రచారం సాగినప్పటికీ స్పష్టత రాలేదు. కానీ, చిత్ర విడుదల విషయంలో క్లారిటీ వచ్చింది.
ప్రముఖ నిర్మాత దిల్రాజు నిర్మించిన 'జాను' చిత్రం ఈ నెల 7న ప్రేక్షకుల ముందుకు రానుంది. ఈ నేపథ్యంలో మీడియా సమావేశానికి హాజరైన దిల్రాజు ఈ చిత్రం గురించి మాట్లాడారు. 'ఎఫ్ 3' వచ్చే ఏడాది సంక్రాంతికి విడుదల చేసేందుకు సన్నాహాలు చేస్తున్నట్లు తెలిపాడు. ఈ సినిమాను కూడా అనిల్‌ రావిపూడే తెరకెక్కిస్తున్నాడని స్పష్టం చేశాడు. త్వరలోనే నటీనటుల వివరాలు ప్రకటిస్తామన్నాడు.